Mbi gjysmë miliardi euro të investuara në merkato nga janari 2025 deri më sot. Manchester City duket si një pus pa fund kur bëhet fjalë për zhvillimin e negociatave: ulet në tryezë, hap valixhen dhe lë që paratë të verbojnë palën tjetër. 23 milionë eurot e vëna në buxhet në këtë sesion për të realizuar goditjen e 15-të në një vit janë vetëm maja e ajsbergut.
Blerja e fundit e serisë është mbrojtësi Guehi nga Crystal Palace (pas pagesës 73.6 milionë për Semenyo nga Bournemouth), qershia mbi tortë e një fushate rinovimi të skuadrës që është konstante për ekipin e Pep Guardiolës. Citizens mund të bëjnë, madje duhet: kanë nevojë për përforcime dhe për t’u rigjeneruar në mënyrë që të jenë gjithmonë konkurrues dhe të synojnë fitimin e trofeve në Premier League, Champions dhe kompeticionet ndërkombëtare.
Paratë e shpenzuara nga janari 2025 deri sot
Janar 2025 – 217,3 milionë euro
Vera 2025 – 221,6 milionë euro
Janar 2026 – 96,6 milionë euro
Totali – 535,5 milionë euro
Një shifër mbresëlënëse, që e çon totalin e shpenzuar që nga ardhja e Guardiolës në krye të Manchester City (2016) në mbi dy miliardë euro, dëshmi e masës së jashtëzakonshme të burimeve të djegura nga klubi për të fituar. Dhe jo gjithmonë duke ia dalë.
Në një vit merkato janë shpenzuar mbi gjysmë miliardi euro
Omar Marmoush (75 milionë nga Eintracht Frankfurt), Nico González (60 milionë nga Porto), Abdukodir Khusanov (40 milionë nga Lens), Vitor Reis (35.5 milionë nga Palmeiras) dhe Juma Bah (6 milionë euro) janë lojtarët që Manchester City bleu në janar 2025 për një total prej rreth 218 milionë eurosh. Dy prej tyre, megjithatë, mbërritën në Etihad vetëm kalimthi për t’u huazuar më pas (Reis te Girona, Bah mes Lens dhe Nice).
Cilët janë lojtarët e ardhur dhe sa kanë kushtuar
Janar 2025
Omar Marmoush (75 milionë)
Nico González (60 milionë)
Abdukodir Khusanov (40 milionë)
Vitor Reis (35.5 milionë)
Juma Bah (6 milionë)
Qershor–Shtator 2025
Tijjani Reijnders (rreth 54.6 milionë)
Rayan Aït-Nouri (rreth 42.5 milionë)
Rayan Cherki (40.1 milionë)
Gianluigi Donnarumma (30.7 milionë)
Marcus Bettinelli (2.4 milionë)
Sverre Nypan (14.6 milionë)
James Trafford (36.6 milionë)
Janar 2026
Antoine Semenyo (73.6 milionë)
Marc Guehi (23 milionë)
Lexo më tej: Vuri bast për 10-1 të Manchester City e bëri “cash out” te 9-1: sa humbi bastexhiu
Në verë shuma totale ishte rreth 220 milionë euro. Nga qershori në shtator u afruan Tijjani Reijnders (rreth 55 milionë nga Milan), Rayan Aït-Nouri (rreth 43 milionë nga Wolverhampton), Rayan Cherki (rreth 40 milionë nga Lyon), Gianluigi Donnarumma (30.7 milionë nga PSG si pasardhës i paracaktuar i Ederson), Marcus Bettinelli (2.4 milionë nga Chelsea), Sverre Nypan (rreth 15 milionë nga Rosenborg dhe më pas i huazuar te Middlesbrough), James Trafford (nga Burnley për 36.6 milionë euro).
Ka mbaruar? Aspak. Të paktën deri tani, në janar 2026, Manchester City nuk ka pasur asnjë problem të shpenzojë rreth 100 milionë (96.6 për të qenë të saktë) për Antoine Semenyo (73.6) dhe Marc Guehi nga Crystal Palace (23 milionë), që mbyllin sekuencën e gjatë të lojtarëve të afruar.
