Qeveria egjiptiane njoftoi sot se është arritur një marrëveshje lidhur me emrat e anëtarëve të komisionit teknokratik palestinez prej 15 vetash, i cili do të marrë përsipër administrimin e Rripit të Gazës, në kuadër të planit paqësor të presidentit amerikan Donald Trump.
“Shpresojmë që pas kësaj marrëveshjeje, së shpejti të shpallet zyrtarisht përbërja e komisionit dhe më pas ai të vendoset në Rripin e Gazës për të menaxhuar jetën e përditshme dhe shërbimet bazë”, deklaroi ministri i Jashtëm egjiptian, Badr Abdelaty, pas bisedimeve të zhvilluara në Kajro për këtë çështje.
Abdelaty theksoi se, pavarësisht krijimit të këtij organi të ri teknokratik që do të administrojë Gazën për një periudhë kalimtare, Egjipti nuk do të lejojë ndarjen politike të Rripit të Gazës nga Bregu Perëndimor, duke nënvizuar rëndësinë e zgjidhjes me dy shtete.
Ministri i Jashtëm egjiptian shprehu gjithashtu shpresën se së shpejti do të bëhen publikë emrat e 15 anëtarëve dhe do të nisë faza e dytë e planit paqësor të presidentit të SHBA-së, Donald Trump, për Gazën.
Sipas informacioneve, disa nga anëtarët e komisionit ndodhen aktualisht në Gaza, ndërsa të tjerë jashtë Rripit. Gazeta izraelite Haaretz raporton se komisioni fillimisht do të ketë selinë në Kajro, megjithëse kjo ka të ngjarë të kërkojë nga Izraeli rihapjen e pikës kufitare të Rafahut.
Ende nuk është e qartë se kur komisioni do të mund të nisë funksionimin, pasi Shtetet e Bashkuara vazhdojnë përpjekjet për të siguruar fondet e nevojshme për këtë nismë, me sukses të kufizuar deri tani.
Sipas mediave izraelite, komisioni do të drejtohet nga Ali Shaath, ish-zëvendësministër i Transportit i Autoritetit Palestinez.
