Zbardhen emrat e personave të arrestuar pas arratisjes së të dënuarit Altin Ndocit nga spitali rajonal i Durrësit, ngjarje e ndodhur një ditë më parë, teksa ai bashkë me disa të burgosur të tjerë kishte shkuar për një vizitë mjekësore.
Bëhet me dije se në kuadër të hetimeve janë vënë në pranga gjithsej tetë persona, mes tyre efektivë policie dhe staf shëndetësor, të dyshuar për shpërdorim detyre.
Të arrestuarit janë: Aulon Çuko, kryeinfermier në spitalin e Durrësit, Desdemon Pazaj, zëvendësshef i Policisë dhe pesë efektivë policie që shoqëronin të burgosurit, Dorjan Saraçi, Sal Ferollari, Preng Marvataj, Fatjon Baci, Aranit Çela. Po ashtu, në pranga ka rënë edhe një grua, e identifikuar si Violeta Uka, e cila është punonjëse e burgut të Durrësit.
Altin Ndoci arriti t’i shpëtojë efektivit që e shoqëronte në spital duke e goditur fizikisht punonjësin e sigurisë së burgut. Ai vrapoi mes automjeteve në parkimin e spitalit dhe më pas u zhduk pas një ndërtese, ku dyshohet se e priste një automjet me të cilin u arratis.
