Kreu i Shtëpisë së Bardhë, Donald Trump, i është referuar vetes si “president në detyrë i Venezuelës” në një imazh të rremë të Wikipedias, të publikuar në llogarinë e tij në Truth Social.
Postimi, i cili ka marrë më shumë se 24 mijë pëlqime, është më i fundit në një seri pretendimesh se Trump dhe Uashingtoni janë në kontroll të vendit të Amerikës së Jugut pas kapjes së Nicolás Maduro-s më 3 janar.
Në një intervistë për New York Times, Trump tha se SHBA-ja mund ta qeveriste Venezuelën dhe të shfrytëzonte rezervat e saj të naftës për vite me radhë. Kur u pyet nëse kjo nënkuptonte tre muaj, gjashtë muaj apo një vit, ai u përgjigj: “Do të thosha shumë më gjatë.”
Trump ka pohuar vazhdimisht se Shtetet e Bashkuara do ta “drejtojnë” Venezuelën, pavarësisht se presidentja e përkohshme, Delcy Rodríguez, ka këmbëngulur se asnjë fuqi e huaj nuk po e qeveris vendin e saj.
Një ditë më herët, qeveria venezueliane tha në një deklaratë se Karakasi “ka vendosur të nisë një proces eksplorues të natyrës diplomatike me qeverinë e Shteteve të Bashkuara të Amerikës, me qëllim rivendosjen e misioneve diplomatike në të dyja vendet”.
U konfirmua gjithashtu se zyrtarë të Departamentit Amerikan të Shtetit po vizitonin kryeqytetin venezuelian dhe se po shqyrtohej edhe një vizitë reciproke në Uashington.
