50 protestues janë vrarë në Iran që nga 28 dhjetori, në fillim të mobilizimeve protestuese kundër pushtetarëve, njoftoi sot një organizatë joqeveritare.
"Të paktën 51 protestues, përfshirë 9 fëmijë nën moshën 18 vjeç, janë vrarë dhe qindra të tjerë janë plagosur gjatë 13 ditëve të para të lëvizjes protestuese në të gjithë Iranin", tha OJQ Iran Human Rights me bazë në Norvegji.
Mbi 24 orë ndërprerje në internet
Ndërkohë, mbyllja mbarëkombëtare e internetit e vendosur nga autoritetet iraniane për shkak të protestave në Iran tashmë ka zgjatur 24 orë, tha sot OJQ-ja e sigurisë kibernetike Netblocks.
"Kanë kaluar 24 orë që kur Irani vendosi një mbyllje totale të internetit në shkallë kombëtare, me lidhjen e reduktuar në 1% të nivelit të tij të zakonshëm", shkruan organizata joqeveritare në mediat sociale X.
Mediat e huaja shkruajnë se djali i ish-shahut të Iranit dhe figurës opozitare në mërgim i kërkoi sot Donald Trump të ndërhyjë pa vonesë në Republikën Islamike, ku po zgjerohet një lëvizje sfide kundër pushtetarëve.
"Zoti President, ky është një apel urgjent dhe i menjëhershëm me të cilin kërkoj vëmendjen, mbështetjen dhe veprimin tuaj", shkroi Reza Pahlavi në rrjetet sociale.
Reza Bahlawi, i cili jeton pranë Uashingtonit, nuk specifikoi se çfarë lloj ndërhyrjeje priste nga presidenti amerikan, por e justifikoi kërkesën e tij me vendimin e autoriteteve iraniane për të ndërprerë aksesin në internet në vend dhe goditjen e tyre ndaj protestuesve.
"U bëra thirrje qytetarëve të dalin në rrugë për të luftuar për lirinë e tyre dhe për të tronditur forcat e sigurisë me numrin e tyre. Kjo është ajo që ata bënë mbrëmë. Kërcënimet tuaja ndaj këtij regjimi kriminal gjithashtu i kanë mbajtur larg banditët e regjimit. Megjithatë, koha është e ngutshme. Qytetarët do të dalin sërish në rrugë pas një ore. Kërkoj ndihmën tuaj", tha ai, duke iu drejtuar Donald Trump.
Presidenti amerikan dje kërcënoi se do të godasë Iranin shumë fort nëse autoritetet reagojnë duke vrarë protestuesit. Pas dy javësh të një lëvizjeje fillimisht të lidhur me koston e jetesës, vala e mospajtimit po fiton terren dhe po përbën një sfidë serioze për Republikën Islamike, e cila ka qeverisur që nga viti 1979.
