Kryetari i Partisë Demokratike, Sali Berisha thekson se të gjithë opozitarët duhet të bëhet bashkë për të bërë të mundur largimin e qeverisë së Edi Ramës.
Nga takimi që po mban me aleatët politikë e përfaqësues të tjerë, Berisha tha se Rama nuk mund të rrëzohet nga jashtë, dhe as me procese gjyqësore, por me votën e popullit.
“Mendoj se duhet të ngrihemi, duhet të ngrihemi në një përpjekje të madhe qytetare për të larguar nga pushteti këtë bandë, këtë organizatë kriminale, me në krye Edi Ramën. Ideja se mund të vijnë të na e heqin nga jashtë është e gabuar. Ideja se mund të hiqet me procese gjyqësore është po kaq e gabuar, sepse ai bllokon. Ai do përdorë pushtetin me të gjitha forcat për të mbrojtur krimet e tij. I vetmi që nuk mund t’i shpëtojë dot është gjykatësi popull.”, tha Berisha.
Për këtë arsye, tha kryedemokrati, duhet që të bëhen bashkë e gjithë opozita për të bërë të mundur rrotacionin politik. Përmes qeverisë teknike, shtoi Berisha, duhet të mundësojnë zgjedhje të lira dhe të ndershme. Ai shtoi se nëse do të mundësohen zgjedhje të ndershme, është i bindur që PD do të vijë në pushtet.
“Ndaj dhe mendoj se në frymën e përgjegjësisë më të lartë ne duhet të dalim me një forum opozitar të zgjeruar. Forca politike, shoqëri civile, personalitete dhe cilido që është i gatshëm të përballemi me këtë regjim për të shpëtuar Shqipërinë. Ne kërkojmë një qeveri teknike thjesht me dy objektiva. Së pari përgatitjen e zgjedhjeve të lira dhe të ndershme. Ato nuk ekzistojnë më. Ne jemi forca politike opozitare, nuk vijmë në pushtet me dhunë. Jo, ne vijmë në pushtet me votën e shqiptarëve, vullnetin e tyre.
Por ne jemi të sigurt në mënyrë absolute se ne i fitojmë zgjedhjet. Se Edi Rrama nuk i fitonte kurrë ato zgjedhje në qoftë se nuk do organizonte me paratë e taksapaguesve 4500 aktivitete për të mashtruar qytetarët. Në qoftë se nuk do falte 2 miliardë euro gjoba dhe kamata dy ditë para zgjedhjeve. Në qoftë se nuk do shpërndante 100 euro në mes të fushatës për 760 mijë votues. Në qoftë se nuk do shndërronte administratën në polici politike terroriste të votës. Etj.
Ne kërkojmë të votojmë të qetë, të votojmë të lirë. Kërkojmë që krimi elektoral të shpallet krim i rëndë. Kërkojmë që ata që rrinë duarkryq ndaj krimit elektoral të ndëshkohen në mënyrën më të rëndë. Ndryshe Shqipëria të ardhme nuk ka. Historia ka provuar se zgjedhjet e lira, demokracia janë i vetmi regjim dhe sistem që krijon dhe ndërton të ardhme.”, u shpreh ai.
