Rreth 50 dele të humbura që u shkëputën nga kopeja e tyre mësynë një supermarket në një qytet gjerman, duke i habitur dhe duke i bërë klientët të vënë buzën në gaz kur panë kafshët mes rafteve.
Inkursioni ndodhi të hënën gjatë një migrimi rutinë sezonal të deleve në komunën bavareze të Burgsinn. Disa dhjetëra dele “kishin ide të tjera” për rrugën dhe hynë në një dyqan të shitjes me pakicë “Penny”.
"Ishte e pamundur të dallohej nëse delet po kërkonin diçka të veçantë me ofertë apo thjesht donin të ngroheshin" - tha kompania në një deklaratë, duke vënë në dukje se tufa dukej veçanërisht e dhënë pas zonës së arkës ku ishin të pranishëm blerësit dhe stafi.
Dëshmitarët thanë se ndërsa kafshët “i rezistuan dëshirës” për të ngrënë produktet e freskëta të ekspozuara, por pushtimi i tyre shkatërroi seksionin e pijeve pasi rrëzuan shishe qelqi dhe produkte të tjera nga raftet.
Videoja tregonte delet duke blegëruar, por që dukeshin më shumë kurioze sesa të shqetësuara.
"Rreth 20 klientët e pranishëm thuhet se e morën vizitën spontane të kafshëve me qetësi," - tha Philipp Stiehler, kryetari i bordit të degës “Penny” në Gjermaninë jugperëndimore.
Pas rreth 20 minutash, delet u nxorën nga dera dhe u ribashkuan me tufën e tyre.
Stiehler hodhi poshtë spekulimet se Penny planifikonte t'i faturonte bariut të tyre dëmin ose kostot e pastrimit. Kompania shfrytëzoi vëmendjen e medias në të gjithë vendin dhe postimet virale për të thënë se donte të sponsorizonte ushqimin për 50 delet e arratisura për një vit.
Dieter Michler, bariu, i tha transmetuesit publik se kishte çuar 500 dele me qengjat e tyre në strehën e tyre dimërore. Ai hamendësoi se të paktën disa nga kafshët ishin të shpërqendruara nga lisat në tokë, duke shkuar në rrugë të gabuar dhe të humbnin kontaktin me pjesën tjetër të kopesë.
Pastaj, tha ai, "dikush duhet të ketë hyrë në supermarket me një qese dhe ato e kanë ndjekur", duke parë diçka që për ta mund të ngjante me ushqim të koncentruar ose një thes me kripë, të cilat përdoren për të ushqyer delet.
"Nuk do ta kisha menduar se ishte e mundur që ata të hynin vullnetarisht në supermarket" - tha Michler. ©LAPSI.al
