Vijon të jetë aktiv zjarri që ka përfshirë disa magazina në tregun e rrobave të përdorura në rrugën “5 Maji” në Tiranë, duke shkaktuar panik te banorët dhe bizneset e zonës.
Flakët janë të përmasave të mëdha dhe po rrezikojnë seriozisht edhe disa biznese që ndodhen pranë tregut. Pavarësisht ndërhyrjes së forcave zjarrfikëse, situata mbetet e vështirë për t’u vënë nën kontroll.
Tregtarët kanë zbrazur magazinat e tjera që rrezikohen nga flakët, duke nxjerrë në rrugë ambiente të hapura mallrat që shesin. Mediat raportojnë se policia po evakuon zonën përreth për shkak se pranë vatrës së flakëve raportohet të ketë bombola gazi.
LEXO EDHE: PAMJET/ Vijon prej 1 ore zjarri masiv në tregun e rrobave të “5 majit” në Tiranë
Për shkak të rrezikut nga përhapja e zjarrit dhe tymit të dendur, banorët e pallateve përreth janë evakuuar nga banesat e tyre si masë sigurie. Policia ka vendosur shiritin e perimetrit të sigurisë dhe po mban larg qytetarët, teksa në zonë janë grumbulluar shumë banorë të shqetësuar.
Autoritetet po punojnë për izolimin e flakëve dhe parandalimin e përhapjes së mëtejshme të zjarrit, ndërsa ende nuk dihen shkaqet e rënies së tij dhe nëse ka persona të lënduar. /LAPSI.al
