Qarku i Lezhës është përfshirë nga reshje të dendura shiu gjatë së martës duke sjellë përmbytje në disa zona për të disatën herë në pak muaj. Uji ka përmbytur banesat, oborret e shkollave dhe bodrume pallatesh. Në Gjadër është rritur niveli i prurjeve të lumit duke përmbytur urën që lidh fshatrat Gramsh dhe Zojz me Gjadrin teksa është ndërhyrë për pastrimin e mbeturinave që kishin bllokuar urën. Banorët e zonave të përmbytura shprehen se janë të sëmurë dhe se askush nuk interesohet për ta ndërsa I bëjnë thirrje qeverisë për ndihmë
Në Bashkinë Mirditë po punohet për largimin e inerteve nga rrugët urbane dhe ato rurale. Shkarkimet nga HEC Qafë Mollë nuk kanë nisur ende, pasi prurjet janë vlerësuar të menaxhueshme.
Sipërfaqja e tokës bujqësore nën ujë në territorin e Bashkisë Lezhë llogaritet rreth 1 010 hektarë, e shpërndarë në disa njësi administrative, Në Bashkinë Kurbin sipërfaqja e përmbytur arrin rreth 2 000 hektarë, kryesisht në zonat e Fushë Milotit, Gjormit, Mamurrasit dhe Adriatikut. Probleme me energjinë elektrike raportohen vetëm në zonat malore të Kurbinit.
