Për shkak të inerteve dhe dherave në aksin Qafë Plloçë-Qukës, aktualisht po mbyllet qarkullimi në këtë segment.
Mësohet nga informacionet më të fundit, se për të marrë masa lidhur me qarkullimin e mjeteve dhe për të shmangur rrezikun si në rastin e mjetit të aksidentuar paraditen e sotme, është mbyllur përkohësisht qarkullimi në këtë aks.
Policia e qarkullimit rrugor Korçë dhe ajo e Elbasanit po i orientojnë mjetet drejt rrugës së vjetër duke vendosur patrulla në hyrje të Qafë Plloçës dhe në hyrje të Qukësit për të mos lejuar hyrjen në aksin e ri.
Aksi do të qëndrojë i mbyllur deri në momentin që firma kontraktore të pastrojë plotësisht të gjitha dherat e inertet që kanë rënë në rrugë dhe derisa të mos ketë më rrezik për qarkullimin e mjeteve. Nuk dihet se sa do të zgjatë bllokimi i qarkullimit në këtë zonë.
Qukës - Qafë Plloçë u përurua para zgjedhjeve të 11 majit nga vetë kryeministri Rama dhe ministrja e infrastrukturës Belinda Balluku. Ajo kushtoi mbi 260 milionë euro dhe që prej hapjes nuk kanë munguar problemet. Aksi është konsideruar si mjaft i kushtueshëm pasi nuk shkurton shumë rrugën e vjetër, por edhe cilësia e punimeve është vënë shpesh në dyshim.
Pak kohë më parë aty pati një shkarje të madhe shkëmbinjsh ndërsa këtë të mërkurë rënia e inerteve rrezikoi jetën një personi, makina e të cilit u godit në lëvizje. /LAPSI.al
