Një grup banorësh të zonës së Kënetës në Durrës kanë protestuar për të kërkuar vëmendjen e strukturave të shtetit pasi banesat e tyre janë ende nën ujë për shkak të reshjeve të dendura të shiut.
Banorë thonë se kanalet janë të bllokuar dhe se kanë mbi 30 cm ujë në oborret dhe banesat e tyre. Ata shprehen se ende nuk ka shkuar asnjë njeri për t’i ndihmuar.
“Uji nuk po tërhiqet të heqin ujin nga rrugicat dhe nga banesat sepse dëmet janë shumë të mëdha.”, tha një banor.
“Të vijnë të na shohin sepse jemi në mëshirë të fatit.”, shton një tjetër.
“Askush nuk ka ardhur nga grupet e verifikimit për të parë situatën”
“Jemi të izoluar nga uji”
“Nuk po na ndihmon askush”, shprehen banorët.
Një tjetër thotë se edhe më herët janë përmbytur dhe nuk i kanë dëmshpërblyer pavarësisht premtimit.
“Ankesa ime ndaj shtetit e Edi Ramës. Kërkoj ndihmë. Jam i përmbytur, familje me 4 pjesëtar. Uji arrin deri në 30 cm. Nuk ka zgjidhje. Nuk është vetëm për veten time por edhe për të tjerët. Kjo është hera e dytë që përmbytemi, është hera e dytë. Nuk kemi marrë dëmshpërblim”, u shpreh një banor.
“Na kanë premtuar, na kanë thënë hapni llogarie edhe asgjë. Nata e mbrëmshme ka qenë stres, të jetosh me ujë me fëmijë të sëmurë në shtëpi. Ne taksat paguajmë, detyrimin e shtetit, por të na bëjnë shërbimin. Askush nuk kam takuar. I kam marrë në telefon dhe se kanë çarë kokën fare”, shtoi një banor tjetër.
“E dimë që një kriminel është në Shqipëri, por e gjithë qeveria kriminela qenkan?”, shtoi një tjetër.
