Kreu i Partisë Mundësia, Agron Shehaj, ka reaguar përmes një postimi në rrjetet sociale, duke iu drejtuar deputetëve të opozitës që janë anëtarë të Këshillit të Mandateve dhe që disponojnë dosjen ndaj Belinda Ballukut.
Shehaj u bëri thirrje këtyre deputetëve që ta bëjnë publike dosjen voluminoze prej rreth 16 mijë faqesh, duke theksuar se transparenca është në interes të qytetarëve. Sipas tij, në këtë rast duhet të veprohet edhe përtej kufijve ligjorë.
"Ka ardhur momenti që deputetët e opozitës të shkelin ligjin. Duhet të bëjnë publike dosjen me 16 mijë faqe me fakte dhe prova që tregojnë që Belinda Balluku është e korruptuar dhe duhet të arrestohet.
Pesë anëtarët e Këshillit të Mandateve kanë të paktën dy javë që e kanë këtë dosje dhe duhet ta bëjnë publike sepse është e vërtetë që shkelin ligjin por në fund të fundit edhe një protestues kur përplaset me policinë shkel ligjin.
Dhe mos harrojmë që Edi Rama po shkel ligjin duke mos lejuar arrestimin e Belinda Ballukut. Dhe nuk ka asgjë të keqe nëse përfaqësuesit e opozitës shkelin ligjin në interes të qytetarëve shqiptarë.
Nëse nuk duan ta bëjnë ata, le t'ja kalojnë këto informacione, këtë dosje me 16 mijë faqe mediave, dhe merren mediat.
Sepse nuk mund të presim që Edi Rama të lejojë arrestimin e Belinda Ballukut.Nuk ka për ta bërë kurrë sepse e di shumë mirë që pas Belinda Ballukut rradhën e ka ai" - deklaron Shehaj.
