Një rekord i ri është vendosur nga qershitë e çmuara japoneze “Sato Nishiki” të prefekturës verilindore të Yamagatës. Një kuti u shit për 1.8 milion jen në tregun Toyosu, ekuivalente me afërsisht 9 850 euro. Kjo përkthehet në 140 euro për secilën kokërr. Në qytetin e Tendos, zemra e prodhimit kombëtar të qershive, një kuti tjetër me 68 fruta u shit për 1.55 milion jen, një rekord i ri lokal.
Këto qershi shiten në ankande që nuk pasqyrojnë çmimin mesatar me pakicë, por shërbejnë si një matës i prestigjit të këtyre produkteve të shkëlqyera. Frutat, të cilat shiten në internet, janë të destinuara për një treg të ngushtë të ndjeshëm ndaj cilësisë së lartë dhe përfaqësojnë simbolin e luksit që karakterizon këto produkte në Japoni.
"Menaxhimi ka qenë veçanërisht sfidues këtë vit për shkak të motit të paqëndrueshëm. Ne duam të bëjmë çmos për të ofruar një produkt që i kënaq klientët tanë", - tha Kenichi Mannen, zv.menaxher i shitjeve të Ja Tendo Foods, ferma që fitoi ankandin lokal.
Debutimi i tyre në treg erdhi më herët se periudha tradicionale e pjekjes, e cila zakonisht ndodh në fillim të verës, falë një teknike kultivimi të quajtur "e detyruar". Siç shpjegojnë mediat lokale kjo është një teknikë që alternon një periudhë ftohjeje të pemëve, duke simuluar dimrin, e ndjekur nga rritja e mbrojtur e frutave në një serë. ©LAPSI.al
