Ish-kryeministri Sali Berisha ka shkuar sot në SPAK, ku do të paraqitet në GJKKO sa i takon masës së dhënë nga gjykata për ‘detyrim paraqitje’. Berisha është pritur nga mbështetës të tij dhe deputetë, me ovacione. Kujtojmë se ndaj tij është caktuar masa ‘detyrim paraqitje’ për çështjen e privatizimit të ish-kompleksit Partizani.
Kreu i PD-së Sali Berisha deklaroi pas daljes nga ambientet e SPAK se kryeministri Edi Rama do të ketë fatin e Nicola Maduros.
Duke e cilësuar kryeministrin si “Ramaduro”, Berisha u shpreh se Rama vetë ka pranuar se është fajtor, por sipas tij është justifikuar me faktin se Shqipëria nuk ka burime nafte si Venezuela dhe kartelet e saj janë më të vogla se ato të vendit latin.
Berisha theksoi se fati i Ramës do jetë i njëjtë si i Maduros, duke shtuar se do të jetë populli shqiptar që do ia japë atë dhe jo forcat Delta të SHBA-ve.
"Sipas Ramës, problemi është se Shqipëria nuk ka naftë, paçka se thoshte që Shpiragu noton mbi naftë, e harroi këtë ky, thotë se kartelet në Shqipëri janë më të vogla se në Venezuelë. Të gjitha këto dëshmojnë se Edi Rama pranon vetë fajësinë, pranon se është Ramaduro i Europës dhe pranon se ka vetëm një fat dhe ky është fati i Maduros. Këtë natyrisht do ja japin Delta apo populli, unë them se ja jep populli shqiptar. Për dijeni, MC Gonigal-i ishte aty, po dëshmonte, është hapur dosja e tij”, u shpreh ai.
