Ambasadori i SHBA-së në OKB Mike Waltz, ka deklaruar se në operacionin e SHBA në Venezuelë nuk ka pasur aspak shkelje të së drejtës ndërkombëtare. Ai theksoi se Trump i dha shumë mundësi Madurës, por që sipas tij nuk u morën aspak parasysh.
Waltz e krahasoi operacionin me ndërhyrjen amerikane të vitit 1989 kundër ish-diktatorit panamez Manuel Noriega, duke kujtuar se ai u arrestua, u akuzua, u dënua nga një gjykatë amerikane dhe vuajti dënimin në Shtetet e Bashkuara dhe më pas në Panama.
“Ne nuk e kemi pushtuar Venezuelën, nuk kemi forca ushtarake në vend. Ne kemi sjellë para drejtësisë një kriminel të kërkuar të cilit Presidenti Trump i dha shumë mundësi. Ne nuk do të tërhiqemi nga detyrimet tona ndaj botës dhe qytetarëve të Venezuelës.
Më shumë se 50 vende dhe organizata nuk e njohin Maduron si udhëheqësin e zgjedhur të vendit. Zgjedhjet ishin një farsë dhe Maduro nuk është Presidenti i vendit”, tha ambasadori i SHBA-së në takimin e Këshillit të Sigurimit të OKB-së.
Deklarata vjen mes reagimeve të forta ndërkombëtare ndaj arrestimit të presidentit venezuelian dhe debatit të ndezur në Këshillin e Sigurimit mbi ndikimin e këtij veprimi në paqen dhe sigurinë ndërkombëtare.
Ndërkohë, vendimi i OKB-së vjen pas disa vendeve, përfshirë Kolumbinë, Iranin dhe Afrikën e Jugut, që e konsideruan veprimin amerikan si shkelje të ligjit ndërkombëtar dhe kërkuan ndërhyrjen e trupit botëror kundër veprimeve të njëanshme të Amerikës.
