Luciano Spalletti ka parë shumë gjëra në futboll dhe e di mirë që entuziazmi duhet ushqyer me punë dhe sakrificë, pa “ulur vigjilencën”. Një koncept që trajneri i Juventusit e ka përmbledhur në mënyrë shumëngjyrëshe ndaj një tifozi që e pyeste me bindje për mundësitë e bardhezinjve për titullin, të galvanizuar nga seria e rezultateve pozitive e kulmuar me fitoren në transfertë ndaj Pizës.
Spalletti i provokuar nga një tifoz për Juventusin kampion
Skena ka ndodhur në aeroport, me teknikun Spalletti të zënë me autografe dhe selfie me tifozët pas Pisa-Juve. Ndërsa trajneri po përpiqej të kënaqte kërkesat e mbështetësve bardhezinj, një prej tyre e ngacmon: “Trajner, e fitojmë titullin?”
Tekniku u përgjigj në stilin e tij, po aq shakaxhi sa edhe i prerë: “Rri urtë… fitojmë një k*r, asgjë nuk fitojmë.”
Me buzëqeshje, më pas Spalletti u përpoq edhe të shmangte kamerën e celularit, duke bërë shaka me tifozin para se të largohej.
Trajneri i Juventus frenon entuziazmin
Një moment argëtues, por që konfirmon vullnetin e trajnerit për të mbajtur këmbët në tokë. Pa dyshim, efektet e punës së tij po shihen te një Juventus që është rikthyer në binarë si në kampionat ashtu edhe në Champions League. Katër fitore radhazi: ndaj Pafos në Europë dhe në përballjet direkte me Bolognën dhe Romën, përpara transfertës së vështirë të Pizës (shtatë fitore në tetë ndeshjet e fundit, me të vetmen humbje në Napoli).
Në këtë ndeshje Juventus ka ditur edhe të vuajë, për t’u imponuar më pas në pjesën e dytë, falë edhe lëvizjeve të teknikut Spalletti. Lëvizje që erdhën pas një qortimi të fortë në dhomat e zhveshjes, ku Luciano ngriti zërin duke i kujtuar grupit përgjegjësitë ndaj fanellës që veshin, duke marrë më pas përgjigje në fushë.
Në këtë klimë përqendrimi maksimal dhe “rreshtash të shtrënguar” (mjafton të mendohet edhe reagimi ndaj Locatellit në momentin e zëvendësimit), trajneri i Juventus nuk dëshiron aspak të mendojë për titullin dhe për diferencën nga skuadrat kryesuese, të cilat për më tepër kanë edhe ndeshje për të rikuperuar. Ajo që duhet bërë është të hysh në fushë dhe të fitosh: koha e llogarive është ende larg.
