Rregulli i ri për pozicionin jashtë loje që FIFA dëshiron të fusë mund të ndryshojë vërtet gjithçka në vlerësimin e pozicioneve të lojtarëve në fushë dhe të çaktivizojë punën e VAR-it, duke reduktuar ndjeshëm polemikat që lidhen me vendime milimetrike (si në rastet e offside për një takë apo majë këpuce). Propozimi i ilustruar nga presidenti Infantino hyn në një plan të përgjithshëm reformash të futbollit për ta bërë atë më të drejtë (të paktën sipas synimeve) dhe më spektakolar, si edhe për të bërë qartësi njëherë e përgjithmonë mbi situata të bujshme. Është një ide e vjetër e Federatës, e quajtur muajt e fundit “ligji Wenger”, duke iu referuar sugjerimit të ish-trajnerit të Arsenal, aktualisht përgjegjës për zhvillimin global të futbollit në FIFA.
Çfarë thotë rregulli aktual për pozicionin jashtë loje
Sipas rregullores aktuale (neni 11), një lojtar konsiderohet në pozicion jashtë loje nëse: “çdo pjesë e kokës, trupit ose këmbëve është në gjysmën kundërshtare të fushës (duke përjashtuar vijën qendrore); çdo pjesë e kokës, trupit ose këmbëve është më afër vijës së portës kundërshtare sesa topi dhe sesa kundërshtari i parafundit. Duart dhe krahët e të gjithë lojtarëve, përfshirë portierët, nuk merren parasysh”. Kjo përfshin edhe çdo protuberancë minimale (si maja e këmbës, taka apo edhe koka) që mund ta bëjë aksionin të pavlefshëm.
Çfarë ndryshon nëse miratohet “ligji Wenger”
Propozimi i shpallur nga presidenti i FIFA-s, Infantino, e përmbys pjesërisht parimin e deritanishëm dhe hap rrugën për një ndryshim të rëndësishëm: është jashtë loje vetëm nëse i gjithë trupi i lojtarit është plotësisht përtej vijës së mbrojtësit të fundit. Në thelb, nëse edhe vetëm një pjesë e trupit (taka, maja e këmbës apo krahu) është në vijë ose pas mbrojtësit, lojtari është në pozicion të rregullt. Është e ashtuquajtura zonë tolerance që favorizon sulmuesit dhe kërkon një hapësirë të dukshme mes lojtarëve që të ketë realisht offside.
Cilat do të ishin pasojat në fushë dhe në lojë të një mase të tillë, nëse do të bëhej rregull zyrtar? Mund të ketë më shumë gola të vlefshëm krahasuar me ata që sot anulohen edhe për një imtësi, më pak ndërprerje nga VAR-i, thjeshtim të vlerësimeve arbitrale dhe, njëkohësisht, më shumë hapësirë për spektaklin.
