Presidenti ukrainas, Volodymyr Zelensky zhvilloi një videotelefonatë me udhëheqësit evropianë përpara takimit të nesërm me Donald Trump. Mediat e huaja raportojnë se mori pjesë gjithashtu edhe Sekretari i Përgjithshëm i NATO-s Mark Rutte.
Qeveria gjermane, në një deklaratë pas bisedës, theksoi se 11 krerët e shteteve dhe qeverive evropiane dhe Kanadaja, e siguruan Ukrainën për mbështetjen e tyre të plotë dhe nënvizuan rëndësinë e bashkëpunimit të ngushtë me Shtetet e Bashkuara për një paqe të qëndrueshme dhe të drejtë në Ukrainë”.
Presidentja e Komisionit Evropian, Ursula Von der Leyen reagoi gjithashtu duke thënë se mirëpresin “të gjitha përpjekjet që çojnë drejt qëllimit tonë të përbashkët: një paqe e drejtë dhe e qëndrueshme që ruan sovranitetin dhe integritetin territorial të Ukrainës”.
“Në vitin 2026, Komisioni i BE-së do të vazhdojë të mbajë presion të lartë mbi Kremlinin, të mbështesë Kievin dhe të punojë intensivisht për ta shoqëruar atë në rrugën e tij drejt pranimit në BE”, shtoi ajo.
