Pika kufitare e Kapshticës ka shënuar këtë vit një fluks të shtuar emigrantësh gjatë vigjiljes së Krishtlindjes.
Gjatë javës së fundit kanë hyrë rreth 40 mijë emigrantë për të kaluar festat e Krishtlindjes, Vitin e Ri dhe pushimet dimërore.
Ndërkohë që rreth gjysma e këtij numri, ka lëvizur nga Shqipëria drejt Greqisë, ku në pikën kufitare shqiptare është angazhuar personel i shtuar për të përballuar fluksin.
Në ditët me lëvizje të madhe, janë hapur shtatë sportele në hyrje dhe dy në dalje, ndërsa pala greke ka pasur vetëm katër sportele, duke krijuar vonesa dhe fluks në territorin grek.
Data 24 dhjetor shënoi pikun e lëvizjes, me rreth 10 mijë emigrantë që hynë në territorin grek. Aktualisht fluksi ka rënë, duke lehtësuar kalimin, ndaj momentalisht janë në funksion katër sportele në hyrje dhe dy në dalje. Zisi tha se autoritetet shqiptare i kanë kërkuar palës greke që në ditët pas ndërrimit të viteve, kur pritet të shtohet fluksi, të bëjnë të mundur shtimin e sporteleve për të shmangur vonesat e mundshme.
Atmosfera festive në Korçë
Ndërkohë, në Korçë, të gjitha strukturat akomoduese janë rezervuar që nga fillimi i dhjetorit, madje siç shprehet Zisi thuajse në “100% për festën e Krishtlindjes” dhe po ashtu natën e ndërrimit të viteve. Zona e Korçës, përfshirë Dardhën dhe Voskopojën, ka regjistruar një shtim të turistëve, jo vetëm nga Europa, por edhe nga Azia. Përveç kësaj, ka pasur një ulje të çmimeve të akomodimeve, ndryshe nga vitet e tjera, për të tërhequr vizitorë më të shumtë.
