Disa fotografi të publikuara së fundmi tregojnë ish-Presidentin e Shteteve të Bashkuara, Bill Clinton, me një grua duke notuar në një pishinë.
Fotografitë besohet se janë realizuar gjatë viteve 1990 dhe fillimit të viteve 2000, periudhë kur Clinton u fotografua disa herë me Epstein, përpara se ky i fundit të arrestohej për herë të parë. Deri më sot, Bill Clinton nuk është akuzuar nga asnjë prej të mbijetuarve të abuzimeve të lidhura me Epstein dhe ka mohuar vazhdimisht se ka pasur dijeni për aktivitetet kriminale të tij.
Në reagim ndaj publikimit të imazheve, një zëdhënës i Clinton, Angel Ureña, deklaroi se fotografitë janë më shumë se 20-vjeçare dhe nuk provojnë asgjë të paligjshme. Ai theksoi se Clinton i ndërpreu kontaktet me Epstein përpara se krimet e tij të bëheshin publike.
“Ka dy lloje njerëzish: ata që nuk dinin asgjë dhe i shkëputën lidhjet me Epstein herët, dhe ata që vazhduan marrëdhëniet edhe pasi gjithçka doli në dritë. Ne jemi në grupin e parë,” shkroi Ureña në rrjetet sociale.
Ai shtoi se publikimi i këtyre imazheve nuk e ndryshon këtë fakt dhe bëri thirrje që fokusi të jetë te përgjegjësia reale, e jo te sulmet politike.
