E ardhmja e Kobbie Mainoo është kthyer në një çështje të vërtetë te Manchester United, që gjatë ndeshjes së djeshme mori një mesazh të qartë në prag të merkatos së ardhshme. Gjysmëvëllai i lojtarit, Jordan Mainoo-Hames, u paraqit në stadium me një bluzë ku shkruhej “Free Kobbie Mainoo”: lirojeni, një mesazh i qartë dhe i drejtpërdrejtë drejtuar klubit, por edhe Ruben Amorim, i cili nuk e sheh aspak si titullar në këtë skuadër. Rrethi i afërt i mesfushorit kërkon më shumë minuta ose madje largim në janar, me shumë skuadra që po presin për të kuptuar zhvillimet e kësaj historie.
Lëvizja e vëllait ka qenë e fundit e një serie provokimesh dhe ankesash që kanë nisur që verën e kaluar. Mainoo ishte në dalje dhe Napoli ishte në pole position për ta marrë në huazim, por “Djajtë e Kuq” preferuan ta mbanin në skuadër, edhe pse nuk e kanë përdorur kurrë si titullar këtë sezon. Situata është bërë gjithnjë e më e nxehtë, në dëm të lojtarit, i cili në moshën vetëm 20-vjeçare është gjetur në qendër të një rasti mediatik shumë më të madh se ai vetë.
Bluza provokuese e vëllait të Mainoo në Old Trafford
Gjatë këtij sezoni Amorim është kritikuar për menaxhimin e mesfushorit të ri nga tifozët, por edhe nga legjendat e Manchester United, të cilët nuk e kuptojnë pse ai është gjithmonë i releguar në stol si zgjedhje e dytë. Trajneri mendon se Mainoo nuk e ka shfrytëzuar mirë hapësirën që i është dhënë dhe ndërkohë është ndezur një luftë e heshtur mes lojtarit dhe klubit, i cili nuk ka ndërmend ta shesë. Lëvizja e fundit ishte ajo e vëllait të tij, që u paraqit në Old Trafford me bluzën me mbishkrimin “Free Kobbie Mainoo”, një apel i drejtpërdrejtë për të gjithë klubin që po e mban “peng”.
Jordan Mainoo-Hames, ish-model dhe pjesëmarrës në Love Island (një program shumë popullor në Angli), nuk kaloi pa u vënë re dhe mesazhi i tij u shpërnda nga shumë tifozë në të gjitha rrjetet sociale. Ai publikoi foton në profilin e tij në Instagram, duke u bërë virale dhe duke kontribuar në ndezjen e një debati tashmë shumë të nxehtë: 20-vjeçari nuk ka luajtur kurrë si titullar në Premier League dhe i janë dhënë vetëm minuta të pakta, me një minutazh shumë të ulët për talentin e tij që ende duhet kultivuar.
Napoli në pritje për janarin
Për “Djajtë e Kuq” ai është një talent për t’u rritur, por Amorim nuk i jep të njëjtën besim që në të kaluarën ia kishte dhënë ten Hag. Që verën e kaluar Mainoo ishte në qendër të diskutimeve të merkatos dhe sot kjo temë bëhet edhe më e nxehtë. Për të interesohen shumë skuadra në të gjithë Europën, duke nisur nga Napoli që disa muaj më parë kishte propozuar një huazim për mesfushorin: marrëveshja nuk u mbyll, por pas provokimit të fundit të vëllait të tij diçka mund të lëvizë për janarin. Mainoo ka nevojë për hapësirë dhe vazhdimësi për t’u afirmuar dhe te Manchester United aktualisht nuk ka absolutisht kushtet për të pasur një rol protagonisti.
