Gary Lineker, ish-sulmues i jashtëzakonshëm dhe prej vitesh opinionist i vlerësuar futbolli, ka arritur një marrëveshje me Netflix që do t’i garantojë një shumë marramendëse parash. Shtëpia e prodhimit e ish-bomberit të Anglisë ka firmosur një kontratë me gjigantin amerikan për realizimin e një podcast-i të përditshëm gjatë Kupës së Botës 2026. Bëhet fjalë për një marrëveshje prej 16 milionë eurosh. Lineker do ta realizojë podcast-in drejtpërdrejt nga Shtetet e Bashkuara së bashku me Micah Richards dhe Alan Shearer.
Lineker shkarkohet nga BBC kthehet me podcast në Botëror
Goalhanger, kompania e themeluar nga komentatori i njohur, ka arritur një marrëveshje të jashtëzakonshme me platformën amerikane të streaming-ut për podcast-in “The Rest Is Football”. Pagesa është shumë e lartë: mbi 2.3 milionë euro në javë për Lineker dhe bashkëpunëtorët e tij. Ish-sulmuesi ka ndërprerë së fundmi marrëdhëniet me BBC-në, e cila e shkarkoi pas akuzave për antisemitizëm, të lindura pas një postimi pro-Palestinë në Instagram.
Podcast-i me Shearer dhe Richards
Lineker do ta prezantojë podcast-in së bashku me Shearer dhe Richards nga një studio në New York, duke përfshirë edhe shërbime nga grumbullimi i kombëtares së Anglisë dhe duke u dhënë hapësirë edhe tifozëve. Përveç kësaj, do të ketë edhe të ftuar specialë që do t’i bashkohen treshes kryesore.
Kryegolashënuesi i Botërorit Meksikë ’86 ka komentuar: “Kjo marrëveshje përfaqëson një mundësi fantastike për ne të tre që të bëjmë atë që duam, pra të flasim për futboll çdo ditë, por në një skenë vërtet globale”.
Përtej ndikimit ekonomik, kjo përfaqëson një hap tjetër përpara për Lineker, i cili me kompaninë e tij prodhon edhe dy podcast-e të tjerë: “The Rest Is History” dhe “The Rest Is Politics”.
