Revista “Politico” ka bërë një renditje të liderëve të botës. Donald Trump, ka njohur një rënie të popullaritetit në SHBA, por mbetet ende si udhëheqësi me më shumë ndikim në Evropë.
Ai po humbet terren në vendin e tij për shkak të kostos së lartë të jetesës dhe politikave të tij anti-emigrantëve (ai vetë e pranoi këtë për herë të parë dy javë më parë duke thënë: "Sondazhet e mia janë pak më poshtë"), por ai kryeson listën e njerëzve më të fuqishëm në Kontinentin e Vjetër të përpiluar nga “Politico”.
Në listën e përpiluar si çdo vit nga gazeta në bashkëpunim me institutin “Public First”, në vend të parë është manjati amerikan, i cili me sa duket nuk ka nevojë të ulet në tavolinat e Brukselit për t'i ndikuar ata. Askush nuk ka më shumë ndikim në vendimet e marra në kryeqytetet e kontinentit tonë. Kjo do të thotë që Evropa shihet më shumë si e varur nga axhendat e të tjerëve sesa si një forcë e aftë të ndikojë në pjesën tjetër të botës.
Anketa online, e cila përfshinte mbi 10 mijë të anketuar në SHBA, Kanada dhe 3 ekonomitë më të mëdha evropiane, Gjermani, Francë dhe Mbretërinë e Bashkuar tregon se evropianët ndajnë të njëjtin mendim me Trump se udhëheqësit e tyre janë të dobët dhe e konsiderojnë presidentin e SHBA-së më vendimtar.
Paradoksi është se personi që konsiderohet më i fuqishëm në politikën evropiane nuk është evropian. Presidentja e Komisionit të BE-së, Ursula von der Leyen renditet në vendin e 7-të.
E dyta pas Trump, por evropiania e parë në renditje, është kryeministrja daneze Mette Frederiksen, një socialdemokrate me qëndrime të krahut të djathtë mbi menaxhimin e kufijve.
Ajo favorizon ndalimin e azilkërkuesve dhe përshpejtimin e riatdhesimeve, njëlloj si kryeministrja italiane Giorgia Meloni, e cila renditet e 9-ta, pas Sekretarit të Përgjithshëm të NATO-s, Mark Rutte, por përpara kryeministrit britanik Keir Starmer.
Në vendin e 3-të është Friedrich Merz, njeriu që thyeu tabutë e pasluftës në Gjermani. Ai është simboli i rimëkëmbjes së Evropës nga kërcënimi rus.
Me një politikë masive riarmatimi dhe riaktivizimin e ushtrisë kancelari gjerman po udhëheq ripozicionimin e vendit të tij nga një fuqi ekonomike në një lidere mbrojtëse për një Evropë që tani është e detyruar të kujdeset për veten.
Në vendin e 4-t është Marine Le Pen, pavarësisht dënimit që kërcënon ta skualifikojë atë nga zgjedhjet e ardhshme presidenciale franceze. Ajo është shumë përpara “banorit” aktual të Pallatit Elize, Emmanuel Macron, i cili është vetëm i 19-ti.
Presidenti francez shihet nga votuesit e tij si një lider që deri më tani ka dështuar të menaxhojë në mënyrë efektive presidentin e paparashikueshëm amerikan.
Përpara Macron është Volodymyr Zelensky i rraskapitur, i cili renditet i 14-i. Vladimir Putin është i pesti. ©LAPSI.al
