Massimiliano Allegri është një furi gjatë Torino–Milan. Kamerat e filmojnë ndërsa është në celular dhe flet me ton të ashpër me bashkëpunëtorët në pankinë. Adrien Rabiot sapo ka shënuar golin e 2-1, duke shkurtuar distancat pas një fillimi tronditës nga ana e kuqezinjve. Trajneri, në tribunë sepse është i pezulluar, e ndjek ndeshjen me shqetësim dhe ajo që sheh nga lart ia humb durimin. Është i zemëruar, gjestikulon. Është i detyruar të qëndrojë atje lart dhe duket si një luan në kafaz duke parë reagimin. Do dhe kërkon shpjegime. Nuk e kap dot sesi ka qenë e mundur të lihen hapësira në mesfushë për granatat, duke pësuar madje atë kundërsulm “vdekjeprurës” që i lejoi Zapatës të realizonte dyfishimin. Dhe çfarë duhet thënë për atë naivitet të pabesueshëm të Tomorit apo për rendimentin në sulm të Nkunku? Asgjë e mirë…
Me kë e kishte Allegri, i zemëruar në celular
Në transmetim të drejtpërdrejtë, gjatë telekomentimit, vjen edhe një shpjegim më i qartë, që shton të tjera detaje në krahasim me rindërtimin shumë të thjeshtë që mund të bëhet duke parë kontekstin dhe momentin e Milanit. Allegri jep urdhra të saktë taktikë, përpiqet të vërë një arnë (siç thuhet në zhargon), të sistemojë gjërat sepse rrjedha që ka marrë ndeshja është e rëndë. E kishte përgatitur sfidën në një mënyrë, në fushë po ndodh tjetër gjë. Milani që ai sheh nga posti në tribunë është ndryshe nga ai i zakonshmi, solid dhe kompakt, i rrezikshëm në kundërsulme. Përkundrazi, duket sikur çahet sapo Torino përshpejton. Si është e mundur? Po… si? Dhe ai përsërit me përpikëri çfarë duhet bërë që të provojë ta rregullojë situatën.
Mimika ndihmon të interpretohet gjendja shpirtërore e Allegrit. Lëviz dorën e djathtë në mënyrë të prerë, ka kokën pak të ulur dhe shqipton me forcë fjalët në mikrofon. Gjëja e parë që e ka bërë të kërcente nga vendi ka qenë lehtësia me të cilën Torino, duke rikuperuar topin përpara zonës së vet të rreptësisë, është larguar në kundërsulm duke gjetur një kundërshtar të zbuluar, të papërgatitur, të habitur, në mënyrë të pabesueshme me ritëm të ulët dhe me distanca të mëdha mes reparteve. Dhe aty ai ka dhënë udhëzime shumë të qarta se si duhet të shtrëngohen radhët.
Trajneri i ka për të gjithë, sepse atje përpara nuk është aspak i kënaqur me atë që po bën Nkunku. Vëren që në fazën ofensive Milani është i sheshtë, nuk sheh dinamizëm dhe kërkon më shumë thellësi. Gjëra që nuk janë parë fare gjatë ndeshjes.
