Bisedimet mes negociatorëve amerikanë dhe ukrainas për një marrëveshje të mundshme paqeje me Rusinë u mbyllën këtë fundjavë në Miami, pa sjellë zhvillime të rëndësishme dhe me pikëpyetje të reja mbi garancitë e sigurisë dhe çështjet territoriale, sipas zyrtarëve ukrainas.
Takimet tre-ditore, ku morën pjesë emisari amerikan Steve Witkoff, dhëndri i Presidentit Donald Trump, Jared Kushner, si dhe zyrtarët ukrainas Rustem Umerov dhe Andriy Hnatov, nisën të enjten dhe përfunduan të shtunën.
“Çështje të vështira ende mbeten,” deklaroi ambasadorja ukrainase në SHBA, Olga Stefanishyna, duke shtuar se të dyja palët po punojnë për zgjidhje “realiste dhe të pranueshme.” Sipas saj, sfidat kryesore lidhen me territorin dhe garancitë e sigurisë.
Ukraina ka theksuar se një përfundim i drejtë i luftës nuk mund ta detyrojë atë të dorëzojë territor të ri dhe duhet të përfshijë garanci të besueshme kundër agresionit rus. Kjo vjen ndërsa Presidenti rus Vladimir Putin deklaroi gjatë një vizite në Indi se Moska synon të marrë rajonin e Donbasit “me çdo mjet.”
Takimet në Miami u zhvilluan pas një vizite të mëparshme të Kushner dhe Witkoff në Moskë. Trump tha se delegacioni amerikan pati “një takim shumë të mirë” me Putinin, edhe pse pa arritur një përparim të prekshëm.
Presidenti Volodymyr Zelensky njoftoi se ka zhvilluar një bisedë “të gjatë dhe konstruktive” me delegacionin ukrainas dhe zyrtarët amerikanë në Miami, duke diskutuar hapa të mëtejshëm drejt një marrëveshjeje që do t’i jepte fund luftimeve. Ai paralajmëroi gjithashtu për rrezikun që Rusia të mos respektojë marrëveshjet, “siç ka ndodhur në të kaluarën.”
Zelensky pritet të takojë të hënën në Londër liderët e Francës, Britanisë dhe Gjermanisë, për të diskutuar kushtet e paqes dhe ecurinë e negociatave nën ndërmjetësimin amerikan.
Në një zhvillim paralel, Kremlini ka vlerësuar strategjinë e re të sigurisë kombëtare të administratës Trump, e cila hoqi nga dokumenti zyrtar referimin e Rusisë si “kërcënim.”
Zëdhënësi Dmitry Peskov e cilësoi këtë “një hap pozitiv,” duke theksuar se dokumenti i ri bie ndesh me qasjen e administratave të mëparshme.
Ndërkohë, strategjia riafirmon synimin e Uashingtonit për të shmangur perceptimin e NATO-s si një aleancë në zgjerim të vazhdueshëm dhe thekson rolin e SHBA-së në ruajtjen e stabilitetit strategjik në Evropë dhe me Rusinë.
