Ronaldo e gjesti i bukur për Diogo Jota: i dërgon familjes orën luksoze me simbolikë

Portugalia këtë vit triumfoi në Nations League, duke mposhtur Spanjën në finale me penallti më 8 qershor në Mynih. Në atë moment futbolli portugez ishte i zhytur në gëzim të pastër, por më pak se një muaj më vonë i gjithë vendi do të zhytej në dhimbje për vdekjen e sulmuesit Diogo Jota, në një aksident rrugor ku do të humbiste jetën edhe vëllai i tij (dhe futbollist gjithashtu) André Silva. Që atëherë kanë kaluar katër muaj dhe Cristiano Ronaldo jo vetëm që nuk e ka harruar ish-shokun e tij të kombëtares, por ka bërë të realizohet edhe për të – sikur të ishte ende gjallë – ora luksoze e personalizuar që ai u ka dhuruar të gjithë lojtarëve të Portugalisë që fituan Nations League. Diogo Jota ka qenë një pjesë e rëndësishme e skuadrës së drejtuar nga Roberto Martinez në rrugëtimin drejt suksesit në kompeticion, duke zbritur në fushë si në fazën e grupeve vitin e kaluar, ashtu edhe në fazat finale të 2025-ës: në gjysmëfinale ndaj Gjermanisë dhe në finale kundër Spanjës nuk ishte titullar, por trajneri e futi në të dyja ndeshjet për të luajtur minutat e fundit.

Ora e personalizuar e dërguar tek familja e Diogo Jota

Ronaldo, i cili ka orë përtej çdo koncepti njerëzor të luksit, vendosi t’u jepte të gjithë shokëve një kujtim të bukur të trofeut të fituar së bashku dhe u dhuroi atyre një orë përkujtimore të personalizuar me vlerë të madhe, prodhuar në edicion të limituar nga Jacob & Co. Ronaldo i ka porositur markës së famshme të bizhuterive, e cila është sponsori i tij personal, edhe orën me emrin dhe numrin e Diogo Jotës, që më pas iu dorëzua familjes së tij. Të gjitha orët e tjera iu dhanë futbollistëve të Portugalisë para ndeshjes kualifikuese të Botërorit kundër Armenisë – e luajtur më 16 nëntor dhe e përfunduar 9-1 – në të cilën Cristiano ishte i pezulluar.

Jacob & Co ka prodhuar 35 ekzemplarë të orës përkujtimore

Çmimi i orëve të personalizuara nuk është zbuluar, por vlerësohet se arrin në disa qindra mijëra euro: bëhet fjalë për një dhuratë vërtet të rëndësishme në total, të cilën Ronaldo mund ta bëjë pa u menduar dy herë, duke pasur parasysh se së fundi ka kaluar kufirin e një miliard eurove pasuri personale (është futbollisti i parë që e arrin).

Celebrating victory on every detail. The Jacob & Co Epic X – UEFA Nations League 2025 Champions is a custom edition made for @portugal ’s national team. A skeleton dial, bespoke design, and the Portuguese crest — a watch as exceptional as the champions themselves. Limited to… pic.twitter.com/ZajX7QTuAx

— Jacob&Co (@_Jacobandco) November 13, 2025

Jacob & Co ka paraqitur në rrjetet e veta sociale edicionin e personalizuar ‘Epic X UEFA Nations League 2025 Champions’ dedikuar skuadrës fituese në kompeticionin e dytë europian për kombëtare. Kompania ka prodhuar 35 ekzemplarë me “çelës skeletik, dizajn të personalizuar dhe stemën portugeze”. Ora është përshkruar si “po aq e jashtëzakonshme sa vetë kampionët”. Nuk mund të thuhet se CR7 është dorështrënguar…