Motra e CR7 Katia shpërthen ndaj portugezëve: “Si Krishti kur u tradhtua nga Juda”

Edhe një herë, familja e Cristiano Ronaldos i del në mbrojtje dhe bashkohet rreth tij, pasi 40-vjeçari portugez është vënë në qendër të polemikave në vendlindje pas pranisë së tij në Shtëpinë e Bardhë mes të ftuarve të rëndësishëm në darkën shtetërore të organizuar nga Donald Trump në nder të princit trashëgimtar saudit Mohammed bin Salman. Në një video të gjatë të publikuar në Instagram, motra e CR7, Katia Aveiro, sulmon kritikët e pesë herë fituesit të Topit të Artë, duke e krahasuar atë me Krishtin e tradhtuar nga Juda. Takimi, i servirur me bujë të madhe mediave botërore, është promovuar nga presidenti amerikan për të kontribuar në rehabilitimin ndërkombëtar të imazhit shumë të kompromentuar të Arabisë Saudite dhe posaçërisht të bin Salman, i njohur nga CIA dhe Kombet e Bashkuara si urdhëruesi i vrasjes brutale të gazetarit Jamal Khashoggi në vitin 2018. Sipas një pjese të opinionit publik portugez, Ronaldo i ka ‘shitur’ shpirtin padronëve të tij sauditë (me koston e 200 milionë në vit, pra paga e tij te Al Nassr, që përfshin edhe propagandën pro-Arabi), duke arritur të shërbejë si ‘testimonial’ në darkën e Shtëpisë së Bardhë.

Shfryrja e motrës së Cristiano Ronaldos, Katia Aveiro

48-vjeçarja Katia Aveiro është më e vogla nga dy motrat e Cristiano Ronaldos dhe edhe ajo, ashtu si 52-vjeçarja Elma, është shumë e lidhur me ish-lojtarin e Juves e Realit. Dhe kështu, disa orë pas darkës së ‘akuzuar’, ajo mban një fjalim të gjatë dhe të ndjerë në mbrojtje të vëllait të saj. “Cristiano Ronaldo është ai që nuk ka pasur nevojë për favore, për parti, për ideologji, për fjalime të parapërgatitura apo për narrativa. Ai ka pasur nevojë vetëm për punë. Diçka që shumë prej kritikëve të tij e njohin vetëm nga emri. Ai ndërtoi një karrierë – kështu nis videoja – Nuk kam nevojë të shpjegoj shumë, sepse asnjë grup komentuesish televizivë, asnjë kukull e opinionit publik dhe asnjë ekspert i indinjimit nuk ka arritur as ta ëndërrojë të përsërisë atë”.

“Hipokritë, duket sikur Cristiano ka shpallur fundin e botës”

Katia më pas kalon te çështja që ndezi polemikat e orëve të fundit: “Ai viziton Shtëpinë e Bardhë dhe ja ku ndodh një shpërthim emocional bërthamor. Hipokritë. Ju jeni hipokritë. Papritur shpërtheu një histeri aq e madhe, por aq e madhe, sa të tremb. Duket sikur Cristiano ka shpallur fundin e botës. Reagimi ka qenë aq i ekzagjeruar, sa dukej sikur ishte një sirenë alarmi kombëtar. Kujdes, kujdes! Ronaldo ka ushtruar lirinë e tij individuale. E përsëris, individuale. Është surreale dhe të bën të vjen keq të shohësh disa grupe që hyjnë në modalitet paniku. Sidomos në vendin tim. Kur Ronaldo bën diçka që nuk hyn në skenarin e tyre. Është gati sikur ata besojnë se planeti duhet të rrotullohet rreth ndjeshmërisë së tyre. Por ndjeshmëri politike, kujdes, që është ndryshe. Një vizitë në Shtëpinë e Bardhë, në mendjen e shumëkujt shndërrohet në një krim diplomatik, moral, shpirtëror dhe galaktik”.

Katia sulmon portugezët, Cristiano si Jezusi

Motra e kampionit portugez u rikujton portugezëve gjithçka ka bërë Ronaldo për vendin e tij, të cilin e akuzon për mosmirënjohje: “Aspekti më komik është se ata vërtet besojnë se kjo do të prishë imazhin e Cristiano Ronaldos. Me modestinë më të madhe, imagjinoni të mendoni se një njeri, një burrë 40-vjeçar, që prej 20 vitesh mban Portugalinë mbi shpatulla, doli nga varfëria, ndërtoi një perandori pa mbështetje, pa favore, pa vjedhur as një qindarkë, mendoni vërtet se ai do të humbasë qoftë një neuroni të vetëm shqetësimi, vetëm sepse disa profesionistë të indinjimit kanë vendosur të sajojnë një skandal? Cristiano Ronaldo ka bërë më shumë për vendin se ç’kanë bërë të gjitha tryezat e rrumbullakëta. Tryeza konferencash, grupe komentuesish, njerëz nga tastiera… ai e ka vendosur Portugalinë në qendër të bisedës së të mëdhenjve, ndërsa shumë nga këta kritikë, këta komentues, kanë futur vetëm mospërputhje në vetë frazat e tyre. Janë të dëshpëruar, por kjo dëshpërim po arrin një nivel të mëshirshëm. Ky vend, fatkeqësisht, ka shumë për të mësuar: ka zili dhe mendjemadhësi. Është e shëmtuar, e shëmtuar, e shëmtuar. Është e shëmtuar si kartëvizitë”.

? Kátia Aveiro sai em defesa de Cristiano Ronaldo e deixa carta aberta ? pic.twitter.com/epLBsrYoh4

— Cabine Desportiva (@CabineSport) November 20, 2025

Lexo më tej: Videoja surreale e CR7 kur hyn për darkën me Trump: shikon përreth, nuk ndodh asgjë

Në këtë pikë Katia Aveiro e krahason Cristiano Ronaldon me Jezu Krishtin dhe portugezët me Judën: “Më kujton kur Krishti u tradhtua nga Juda. Vendi im, fatkeqësisht, është një vend i Judave. Ronaldo nuk është si ju, nuk është bërë nga i njëjti brumë. Për këtë arsye ai ka arritur aty ku ka arritur. Mendoni se gjërat i kanë rënë nga qielli? Ai ka arritur në majë vetëm sepse është ndryshe. Në majë të botës, kujdes, të botës. Dhe pastaj vini e thoni se vizita e tij në Shtëpinë e Bardhë është problematike. Problem jeni ju që mendoni se kjo ndikon në diçka në jetën e tij. Problem është që ju mendoni se Ronaldo ka nevojë për miratimin e dikujt që nuk është larguar kurrë nga ai karrige, nga ai tastierë, nga ai studio. Problem është që jetoni në iluzion. Pas kaq shumë kohësh, pas gjithçkaje që ka arritur, që ju besoni se kjo i njollos imazhin. Për hir të Zotit, një legjendë botërore. Nuk e them unë. E thonë statistikat. Ai ka ndërtuar një trashëgimi reale, ndërsa ju keni ndërtuar indinjim imagjinar. Dhe diferenca është kaq e madhe sa të vjen të qeshësh. Të vjen të qeshësh, betohem që të vjen të qeshësh”.

“Cristiano lëviz botën, ju lëvizni ajrin”

Motra e Ronaldos është një lumë i tërë, deri në sekondën e fundit të videos: “Në fund, realiteti është ky. Pa filtra: Cristiano lëviz botën dhe kritikët çfarë lëvizin? Ajrin. Dhe megjithatë, mendojnë se mund të ndikojnë imazhin e tij. Çfarë keni ndërtuar ju? Të vjen keq që mendoni apo vërtet besoni në atë që thoni. Ju nuk dini asgjë. Më vjen keq. Faleminderit, Cristiano Ronaldo, për gjithçka ke bërë për vendin tim. Faleminderit. Kam një krenari për ty të madhe sa bota. Faleminderit”.