Një ngjarje e rëndë ka ndodhur pasditen e djeshme në Pozzallo të Italisë, ku si pasojë ka humbur jetën një 36-vjeçar. Bëhet me dije se shqiptari u aksidentu, teksa po punonte. Sipas raporteve fillestare, aksidenti fatal u shkaktua nga një pjesë e thyer e krahut mekanik të një pompe betoni (mikseri i betonieres), të përdorur për të hedhur një pllakë betoni në një banesë private në Pozzallo, midis Via San Giovanni dhe Corso Vittorio Veneto.
Sipas mediave italiane, procesi po kryhej me makineri, e cila duket se pësoi defekt dhe fatkeqësisht 36-vjeçari vdiq në vendngjarje. Ndërkohë, disa dëshmitarë folën për një shembje të mundshme të vinçit që ishte në përdorim në kantierin e ndërtimit, një detaj që hetuesit po e verifikojnë për të përcaktuar saktësisht se cila makinë dështoi dhe si.
Një punëtor i dytë, një operator vinçi, u përfshi gjithashtu në aksident dhe thuhet se pësoi lëndime të lehta. Ai u shpëtua dhe u dërgua në spital, por gjendja e tij nuk është kërcënuese për jetën. Shërbimet e emergjencës u njoftuan menjëherë, oficerët e karabinierëve nga stacioni i Pozzallo, së bashku me njësinë e radios mobile Modica dhe inspektorët e Spresal, mbërritën në vendngjarje për të filluar një hetim dhe për të zbardhur dinamikën.
“Shprehim ngushëllimet tona familjes së punëtorit që vdiq në një kantier ndërtimi në Pozzallo, Ragusa, ku një tjetër punëtor u plagos. Por duhet të jemi të qartë për sigurinë: duhet të bëjmë shumë më tepër. Vitin e kaluar, kishte rreth shtatëdhjetë inspektorë pune në Siçili, për një rajon me miliona banorë. Ne duhet dhe mund të bëjmë më shumë”, tha sekretarja e Partisë Demokratike Elly Schlein.
