Ministria e Drejtësisë ka konfirmuar dorëzimin në Zvicër të kërkesës për ekstradimin e ish-zv.kryeministrit Arben Ahmetaj, një procedurë e iniciuar që në vitin 2023, por që mbetet ende e pambyllur. Çështja u rikthye sot në vëmendje gjatë seancës për dosjen “Buka”, ku gjyqtarja Irena Gjoka lexoi përgjigjet e zyrës së Interpol Tiranës mbi statusin procedural të ish-zyrtarit të lartë.
Në sallë, avokati mbrojtës Henrik Ligori sqaroi se për klientin e tij nuk ekziston asnjë masë sigurie në këtë dosje konkrete. Sipas tij, e vetmja masë e përmendur në komunikimet ndërinstitucionale lidhet me një procedim tjetër penal ndaj Ahmetajt, i cili është objekt i një çështjeje të veçantë të regjistruar nga SPAK.
“Kjo çështje nuk ka asnjë masë sigurie për Arben Ahmetajn. Masa i referohet një procedimi tjetër,” deklaroi Ligori, duke nënvizuar ndarjen juridike mes dosjes “Buka” dhe hetimeve të tjera në vijim.
Më 7 dhjetor, SPAK finalizoi hetimin për privatizimin e ish-fabrikës “Buka” dhe e dërgoi dosjen për gjykim në GJKKO. Prokuroria e Posaçme akuzon Ahmetajn se i ka shkaktuar buxhetit të shtetit një dëm prej 7 miliardë lekësh.
