Shqipëria humbet ndeshjen e fundit kualifikuese për Botërorin 2026 përballë Anglisë, por që nuk e ndryshon vendin e dytë të kuqezinjve. Sylvinho humbet ndeshjen e dytë në këtë fushatë, të dyja kundër Tre Luanëve që kanë vetëm fitore, 22 gola të shënuar e asnjë të pësuar. Shqipëria e provoi, me kurajë, pati momentet e veta, por në fund u dënua nga efikasiteti i Harry Kane: dygolësh për të. Lajmi i keq është dëmtimi i Hysajt dhe Brojës, me sulmuesin që doli nga fusha në lot.
[video width="636" height="360" mp4="https://cdnimpuls.com/lapsi.al/wp-content/uploads/2025/11/691a0c2eb97b0.mp4"][/video]
Sylvinho me pesë ndryshime në formacion, në krahasim me ndeshjen kundër Andorrës, edhe për të ruajtur lojtarët që rrezikonin të skualifikoheshin në rast ndëshkimi me të verdhë (përveç Bajramit), sulmoi me Uzunin në majën e sulmit. Anglia, gjithashtu me ndryshime në formacion provoi të bënte keq me Rice e Quensah, që detyroi Strakoshën të bënte një super pritje. I vetmi rast për Shqipërinë në një provë shumë interesante për nga intensiteti e ritmi, ishte goditja e Hysajt që kaloi mbi traversë, para se mbrojtësi të linte fushën i dëmtuar.
[video width="636" height="360" mp4="https://cdnimpuls.com/lapsi.al/wp-content/uploads/2025/11/691a138dc9c0a.mp4"][/video]
Lexo më tej: Anglia, Tuchel njeh vetëm Brojën: “Mund të na shënojë”. Kane do rekordin të paprekur
Kuqezinjtë e teknikut Sylvinho e nisën me besim lojën në pjesën e dytë dhe rrezikuan dy herë në 4 minuta portën e Henderson. Dy herë Hoxha, autor i një provë positive, testoi reflekset e portierit anglez. E para me një depërtim të stilit të tij e me një konkluzion të rrezikshëm, por e dyta ishte një gol i shpenzuar, me një goditje qendrore pas një pasimi inteligjent të Bajramit. Shqipëria qarkullon topin, riniset, mbron: bën gjithcka mirë përballë një rivali të superkuotuar, duke zbavitur publikun që kishte tejmbushur stadiumin Air Albania.
[video width="636" height="360" mp4="https://cdnimpuls.com/lapsi.al/wp-content/uploads/2025/11/691a188ba602a.mp4"][/video]
Tuchel pastaj hodhi në fushë kalibrin e rëndë si Saka e Rashford e diferencën e bëjnë kampionët, në këtë rast Harry Kane. Një devijim fatkeq me kokë i Alijit, në zhvillimet e një goditje këndi, e dërgoi topin në këmbët e qendërsulmuesit të Bayern që dy hapa nga Strakosha e përcolli në rrjetë në minutën e 73’. 0-1 dhe ndeshja e tetë në tetë që mbyllet me fitoren e Anglisë. Shqipëria nuk e prish dot rekordin e përsosur të Tre Luanëve me vetëm fitore e asnjë gol të pësuar, por Sylvinho e njerëzit e tij kanë treguar se mund të luajnë të barabartë, pothuajse, me kombëtare të rëndësishme, si ato me të cilat do të kërkojë të rrëmbejë një biletë për në Botëror në mars.
[video width="636" height="360" mp4="https://cdnimpuls.com/lapsi.al/wp-content/uploads/2025/11/691a1a99e3c72.mp4"][/video]
