Fitorja kundër Moldavisë nuk mjafton për Italinë që të ngjitet në vendin e parë të Norvegjisë: gjashtë fitore radhazi nuk i mjaftojnë Kombëtares për të ëndërruar vendin e parë në grupin e kualifikimeve dhe për të hyrë drejtpërdrejt në Botërorin 2026 pa kaluar nga playoff-et, por i mbetet ende një shpresë shumë e vogël skuadrës së Rino Gattusos për të ndjekur ëndrrën. Është utopi e pastër, por për sa kohë matematika nuk dënon, është e drejtë të mbahet hapur një dritare. Për të shmangur makthin e playoff-eve Italia duhet të fitojë me të paktën 9 gola diferencë, një rezultat që s’është parë kurrë në ndeshjet vendimtare që caktojnë një vend në Kupën e Botës.
Kombëtarja e Haaland dhe shokëve ka qenë një makinë perfekte në gjithë ecurinë e saj, kundërshtari më i keq që mund t’u binte Azurrëve, ende në kërkim të identitetit të tyre. Nuk ka bërë asnjë hap fals, ka shënuar gola me shumicë dhe ata që ka pësuar mund të numërohen me gishtat e një dore. Të dielën në “San Siro” do të jetë përballja përfundimtare që do të mbyllë fazën e parë të kualifikimeve dhe aty Italia, e shtyrë nga publiku i shtëpisë, mund të shpresojë në mrekulli me të vetmen kombinacion të mundshëm për të shmangur ndeshjet shtesë.
Çfarë i duhet Italisë për t’u kualifikuar në Botëror
Të dielën në mbrëmje do të jetë ndeshja që do të mbyllë grupin e kualifikimit, përballja në krye mes Italisë dhe Norvegjisë që do të luftojnë për vendin e parë të Grupit I. Duket vetëm një formalitet sepse tashmë hierarkitë janë përcaktuar: Azurrët janë të dytët me 18 pikë (që në grupe të tjera do t’u kishin vlejtur kreun e renditjes me diferencë të gjerë ndaj vendit të dytë), -3 nga kryesuesja dhe me mundësinë e fundit për të përmbysur gjithçka. Kushti i domosdoshëm është që skuadra e Gattusos të fitojë, por në rast barazimi pikësh kriteri vendimtar nuk do të jetë ai i ndeshjeve direkte.
Lexo më tej: Italia rrezikon ende hyrjen në Botëror: kush janë kundërshtarët e mundshëm në playoff
E vetmja e dhënë që ka rëndësi është diferenca e golave, një numër që i buzëqesh Norvegjisë. Kombëtarja e udhëhequr nga Solbakken ka shënuar 33 gola dhe ka pësuar 4, pra ka një golaverazh +29, ndërsa Italia ka shënuar 20 dhe pësuar 8, me një diferencë golash vetëm +12. Shifrat e dënojnë Kombëtaren me ndeshjet shtesë dhe ka vetëm një rezultat që do ta shpëtonte nga raundi i tretë radhazi në playoff: në “San Siro” duhet të fitojë me të paktën 9 gola diferencë, duke u ngjitur kështu në +21 dhe duke lënë kundërshtarët në +20. Një 9-0 kundër kësaj skuadre duket utopi e pastër dhe një skenar i tillë nuk ka ndodhur kurrë më parë në historinë e futbollit në një ndeshje që cakton një vend në Botëror, por është e vetmja shpresë pas së cilës Italia kapet për të mundur të ëndërrojë ende.
Polemika për kriteret e kualifikimit
Italia e ka drejtuar kursin e saj dhe ka vënë në radhë gjashtë fitore radhazi, por as një rezultat kaq pozitiv nuk mund të mjaftojë për të shkuar drejtpërdrejt në Botëror. Nuk kanë munguar polemikat mbi ecurinë e kualifikimeve dhe vetë Gattuso ka vënë në dukje padrejtësinë e madhe para se të zbriste në fushë kundër Moldavisë, duke krahasuar ecurinë e skuadrave europiane me atë të sudamerikaneve: “Të shohësh grupin sudamerikan, që janë 10 skuadra, 6 shkojnë direkt, e shtata bën ndeshjen shtesë me Oqeaninë, zhgënjimi është ai. Sigurisht duhen rishikuar disa gjëra”. Në Europë vendi i dytë penalizohet, edhe përballë një ecurie perfekte si ajo e Azurrëve që patën fatin e keq të gjenin përballë një Norvegji praktikisht perfekte.
