Myrto Uzuni e Kristjan Asllani, dyshja e golit, por edhe protagonistët e tjerë kuqezinj të një fushate historike, janë lëshuar në emocione e batuta në përfundim të ndeshjes së fituar 0-1 në Andorra. “E punojmë shumë sidomos kur kam topin unë dhe Myrto shkon pas shpine. Jemi të lumtur se e dinim çfarë do të thotë kjo fitore për ne. Do festojmë sot e mendojmë për Anglinë”, tha Asllani.
Mesfushori i Torinos pastaj u ndal te vështirësitë me të cilën kuqezinjtë u përballën ndaj një kundërshtari të blinduar në mbrojtje: “Ekipet e vogla, mbyllen shumë. Unë e Shehu kishim vështirësi, na vinin dy mbrojtës, na mbyllnin mua dhe atë. Por tani të mos mendojmë për ndeshjen, shkojmë në Tiranë të festojmë e pastaj mendojmë për Anglinë”, tha Asllani.
Uzuni: “A jemi live?”
“A jemi live? - e nisi fjalën e tij Uzuni, që shtoi - Është një arritje e madhe për të gjithë shqiptarët, grupi ka qenë shumë i mirë. Ka bërë punë të madhe, rezultatet kanë ardhur nga puna e palodhshme. Unë e ndjej shumë këtë fanellë, do jepja gjithçka. Ata janë gjëra të kaluara, për mua e rëndësishme të shohim përpara. Të ecim përpara me këto ritme”.
Lexo më tej: Andorra-Shqipëri 0-1, shpërthen festa kuqezi, Asllani afron më shumë me play-off-in!
Uzuni ishte nga ata lojtarë që ndryshoi ritmin e lojës, i tij ishte asisti për golin që vendosi ndeshjen: “Topi i Asllanit? Mendoj se dha pasim shumë të mirë, mendoj e preku mbrojtësi që kërceu. Plus dhe erën e kishim kundër. Fitore shumë e madhe sot”.
Hoxha: “Ia dedikoj gjithë shqiptarëve”
“Ishte një ndeshje e vështirë, e dinim që Andorra do të luante kështu. Shyqyr Zotin në pjesën e dytë e ndryshuam impaktin e lojës dhe fituam 3 pikët”. Arbër Hoxha ishte i qartë në vështirësitë që kishte kjo ndeshje, edhe psikologjike. Sidoqoftë, anësori i Dinamo Zagreb nuk e fsheh lumturinë për arritjen e objektivit: “Gjithmonë është kënaqësi të jem këtu. E vendos trajneri sa do të luaj. Çdo lojtar dha maksimumin dhe e fituam ndeshjen”.
Një fanellë kundër Anglisë, për më tepër në një ndeshje pa presionin e rezultatit të gjithë do ta donin, e Hoxha nuk bën përjashtim: “Normale, do të doja të isha edhe ndaj Anglisë, te klubi luaj çdo tre ditë, e kam arritur ritmin e lojës, dhe jam i gatshëm të luaj titullarë. Ia dedikoj gjithë shqiptarëve anë e mbanë botës këtë sukses dhe atyre që kishin marrë rrugë të largët dhe ishin këtu”, u shpreh Hoxha.
Bajrami: “Mund të bësh diferencën edhe për 20 minuta”
“Besoj se sot kemi bërë një ndeshje shumë të mirë. Lojtarët që u futën pjesën e dytë bënë diferencën, edhe nëse je në stol kështu është futbolli. Mund të bësh diferencën edhe për 20 minuta”. Nedim Bajrami e vuan mungesën e një fanelle titullari, por e di mirë se në futboll rëndësi ka të jesh gati në momentin kur thirresh në çështje, sidomos në Kombëtare. “Qëndrimi në stol? Besoj se çdo lojtar do të luajë, është e vështirë, por futbolli është moment. 10 apo 20 minuta, mund të bësh diferencën. Sot e pamë në fushë, morëm 3 pikët në rrugën tonë për Botëror”.
Shehu, nga Andorra te Andorra: “Ëndërr kemi Botërorin”
Julian Shehu bëri debutimin me Kombëtaren pikërisht në ndeshjen e parë me Andorran dhe tani në kthim e sheh veten pranë një realiteti që i dukej një ëndërr, por që dëshiron të realizojë: “Të them të drejtën në ndeshjen e parë nuk e mendoja se do jemi këtu. E dinim që është e vështirë dhe ka qenë rrugëtim i bukur shumë. Nuk kam fjalë. Falënderoj ekipin sepse pa ta nuk do të ishim këtu. E kemi merituar të jemi këtu. Kemi bërë ndeshje të mira dhe të bukura e duhet ta shijojmë pak këtë moment. Falënderoj tifozët sepse na u duk sikur po luanim në shtëpi sot. Ishte arritje ndër më të mëdhat e futbollit në Shqipëri”.
Siqodoftë, mesfushori është i fokusuar ende te një objektiv që dukej utopik, por tani krejtësisht i mundshëm: “Jemi të fokusuar te Anglia dhe duam ta shijojmë. Ëndërr e kemi Botërorin dhe po mendojmë seriozisht tani për Play Off-in. Shpresoj ta realizojmë këtë ëndërr që kemi të gjithë shqiptarët”, tha Shehu.
