Personat që janë mbi 55 vjeç ishin sa një e treta e zgjedhësve që kishin të drejtë vote në zgjedhjet e pjesshme të zhvilluara dje në 5 bashki, Vlorë, Berat, Cërrik, Mat, Tepelenë. 16% e zgjedhësve me të drejtë vote ishin të grupmoshës 55-64 vjeç dhe 18.4% të grupmoshës mbi 65 vjeç, sipas të dhënave zyrtare nga Komisioni Qendror i Zgjedhjeve.
Megjithatë preferenca e tyra për kandidatët që garonin për kryetarë bashkie është vendimtare për rezultatin final të zgjedhje, për shkak të interesit dhe gatishmërisë të tyre shumë më të lartë për të votuar, në krahasim me votuesit më të rinj.
Sipas të dhënave zyrtare nga KQZ, ndonëse përbënin 34.4% të zgjedhësve në listë, grupmosha mbi 55 vjeç dha 50% të votave në total, ose 15.5 pikë përqindje më shumë se pesha e tyre në totalin e listës së zgjedhësve.
Grupmosha më aktive në votime është ajo mbi 65 vjeç, që dha 27.6% të votave, kur përbën 18.4% të listës së zgjedhësve.
Interesi më i lartë nga kjo grupmoshë ka qenë në Mat e Tepelenë, ku më shumë se gjysma e të regjistruarve mbi 65 vjeç kanë shkuar të votojnë dhe më pak në Vlorë, me 18%.
Grupmosha nga 55-64 vjeç dha 22.3% të votave, kur përbënte 16% të të regjistruarve.
Grupmosha 45-54 vjeç ka ekuilibrin më të lartë mes peshës në listën e zgjedhjeve dhe votuesve, me përkatësisht 16.7% dhe 15.5%.
Tek më të rinjtë, kontributi për votën është dukshëm më i ulët për dy arsye kryesore.
Së pari, për shkak të nivelit të lartë të emigracionit, që ka përfshirë kryesisht moshat e reja.
Së dyti, si rrjedhojë e interesit më të ulët që ata kanë për të votuar, çka bën që dhe ata që janë në Shqipëri të mos u drejtohen qendrave të votimit.
Të dhënat zyrtare tregojnë se grupmosha nga 18 deri në 44 vjeç përbënin gati gjysmën e listës së zgjedhësve (48.9%), por ata dhanë në zgjedhjet e djeshme 34.6% të votave totale, duke e lënë “fatin” e rezultateve në dorë të votuesve mbi 55 vjeç.
Interesi i të rinjve për të votuar ka qenë sidomos i ulët në Vlorë, ku më pak se 10% e grupmoshës deri në 35 vjeç që kanë të drejtë vote, i janë drejtuar qendrave të votimit, duke dëshmuar dhe për nivelin e lartë të emigracionit të të rinjve në qytetin bregdetar.
Të rinjtë më të zellshëm për të votuar ishin në Mat dhe Tepelenë, ku 20-25% e atyre që kanë të drejt vote nga 18 në 34 vjeç iu drejtuan kutive të votimit gjatë ditës së djeshme.
Zgjedhjet e pjesshme u zhvilluan gjatë ditës së djeshme në Vlorë, Berat, Cërrik, Mat dhe Tepelenë, pas krijimit të vendeve bosh në postet e kryetarëve të bashkive për shkak të dorëheqjeve, shkarkimeve apo marrjes së mandateve të tjera publike nga ish-kryetarët.
Në total, në listën e zgjedhësve në këto bashki kishte 334,539 persona. Sipas të dhënave paraprake të KQZ-së, përqindja e votuesve ishte 18.45% (për 383 qendra nga 472 gjithsej), me interesin që ishte shumë më i ulët në raport me zgjedhjet normale vendore të vitit 2023, kur pjesmarrja totale ishte rreth 38%.
Zgjedhjet ishin planifikuar dhe në kryeqytet, por u anuluan pas Gjykata Kushtetuese i dha të drejtë kryebashkiakut aktual, Erion Veliaj./monitor.al
