Kryeministri Edi Rama ka reaguar mbi zgjedhjet e pjesshme lokale të mbajtura dje në 5 bashki të vendit.
Pasi ka uruar fituesit, Rama ka gjetur edhe “fajtorin” për pjesëmarrjen e ulët të votuesve. Ai nuk beson se rezultat i rënies së pjesëmarrjes është mungesa e besimit të zgjedhësve në proceset zgjedhore. Sipas tij, kjo ka ndodhur për shkak të motit me shi të ditës se djeshme, dobësisë së opozitës dhe natyrës së zgjedhjeve të pjesshme, të cilat nuk e stimulojnë pjesëmarrjen.
POSTIMI I PLOTË:
5 bashki, 5 fitore dhe 5 arsye më shumë për t’i falenderuar qytetarët për besimin e tyre, pavarësisht dobësisë ekstreme të opozitës, motit me shi të ditës se djeshme, apo vetë natyrës së zgjedhjeve të pjesshme, të cilat nuk se e stimulojnë pjesëmarrjen.
Urime kryebashkiakëve të rinj, nga Bruna, gruaja e parë që do të drejtojë bashkinë e Vlorës;
Ervini i dytë i Beratit, i cili me mbi 83% të votave dhe 13 049 vota nga 15 454 të PS në 11 maj për bashkinë Berat, ka arritur një rezultat mbresëlënës;
Florenci në Cërrik, Gramozi në Tepelenë dhe Altini në Mat, që të tre me rezultate kuptimplota, të cilat janë një themel i fortë i punës që do të pasojë në shërbim të atyre komuniteteve.
