Deputetët gjermanë kanë akuzuar të djathtën ekstreme, partinë Alternative për Gjermaninë (AfD), se vepron si një “qelizë e lidhur me Rusinë”, pas një sërë pyetjesh parlamentare mbi ushtrinë dhe infrastrukturën kritike.
Gjatë një debati në Bundestag të mërkurën, deputeti i CDU-së, Marc Heinrichmann, tha se grupi parlamentar i AfD kishte paraqitur 47 kërkesa brenda një viti për informacion mbi Bundeswehr-in dhe infrastrukturën kritike. Ai shtoi se AfD po “përdorej nga Kremlini si me litar”.
Sonja Eichwede, zv.kryetare e grupit parlamentar të SPD-së, e përshkroi AfD-në si “vegël të interesave ruse”, duke përmendur retorikën miqësore ndaj Moskës dhe vizitat e anëtarëve të partisë në Rusi.
Disa figura të AfD-së, përfshirë Björn Höcke dhe zv/kryetarin Markus Frohnmaier, janë shprehur publikisht në mbështetje të Rusisë dhe kanë planifikuar vizita të tjera në Moskë.
Një nga kërkesat e AfD-së në qershor, me mbi 50 pyetje, kërkonte informacione mbi pajisjet dron të Bundeswehr-it dhe strategjitë e mbrojtjes kundër dronëve armiqësorë. Shumë prej përgjigjeve u klasifikuan si “përdorim zyrtar vetëm”, ndërsa mbi 10 pyetje mbetën pa përgjigje për shkak të rrezikut për sigurinë shtetërore.
Ministri i Brendshëm i Thuringisë, Georg Maier, paralajmëroi më parë se AfD po “keqpërdor të drejtën për të bërë pyetje parlamentare për të hetuar infrastrukturën kritike të vendit”.
Dyshimet lidhen me mundësinë që informacioni të përfitohet nga presidenti rus, Vladimir Putin, pasi dronët dhe avionët luftarakë rusë janë akuzuar së fundmi për shkelje të hapësirës ajrore të BE-së dhe NATO-s.
Deputeti i AfD-së, Markus Frohnmaier, e quajti debatin një “manovër të turpshme elektorale”, duke shtuar se nëse partia paraqiste një rrezik real sigurie, agjencitë e kontrolluara nga qeveria do të kishin vepruar që më parë.
