Në stadiumin e Vlorës u zhvillua një ndeshje e luftuar deri në fund, ku Elbasani arriti të marrë një fitore me shumë peshë përballë Flamurtarit, në kuadër të javës së 10-të të Kategorisë Superiore. Një gol i vetëm, i ardhur nga sulmuesi Xhonatan Lajthia në pjesën e dytë, mjaftoi që verdheblutë të largoheshin me tri pikë të arta nga një fushë tradicionalisht e vështirë.
Elbasani po tregon se është një skuadër e pjekur dhe e organizuar, që di të fitojë edhe pa shkëlqim. Ndërkohë, Flamurtari po përballet me një krizë të thellë që shkon përtej rezultatit – psikologjike, teknike dhe tashmë edhe morale. Atmosfera në shkallët e stadiumit nuk mungoi, por tensioni u reflektua edhe jashtë fushës, me përplasje mes dy tifozerive, çka e bëri sfidën edhe më elektrizuese.
[video width="644" height="360" mp4="https://cdnimpuls.com/lapsi.al/wp-content/uploads/2025/11/6908d5cd53cbf.mp4"][/video]
Në javët në vijim, presioni mbi Morieron pritet të rritet, ndërsa Gvozdenovic do të synojë të mbajë gjallë frymën fituese të një skuadre që po ëndërron kreun.
Lajthia, njeriu i momentit
Në minutën e 62-të, pas një goditjeje këndi të ekzekutuar me saktësi, Lajthia u ngrit më lart se mbrojtësit vendas dhe dërgoi topin në rrjetë me një goditje të fuqishme me kokë. Ishte një gol tipik për sulmuesin e Elbasanit, që po konfirmohet si një nga pikat më të forta të ekipit në këtë fillim sezoni.
Pas avantazhit, Elbasani u tërhoq me kujdes dhe menaxhoi rezultatin, ndërsa Flamurtari kërkoi me ngulm barazimin, duke ushtruar presion të vazhdueshëm në zonën kundërshtare.
[video width="640" height="360" mp4="https://cdnimpuls.com/lapsi.al/wp-content/uploads/2025/11/6908e5dac380c.mp4"][/video]
Kontestet e Flamurtarit dhe ndërhyrja e VAR-it
Skuadra vlonjate pretendoi për disa episode brenda zonës kundërshtare, ndërsa në minutën e 81’, gjyqtari Albert Doda akordoi një penallti për vendasit.
Megjithatë, pas ndërhyrjes së sistemit VAR dhe rishikimit të episodit, vendimi u anulua, duke shkaktuar irritim të madh te lojtarët dhe stafi i Flamurtarit. Ky moment ndryshoi rrjedhën psikologjike të lojës, ndërsa Elbasani shfrytëzoi qetësinë dhe përvojën për të ruajtur rezultatin deri në fund.
[video width="658" height="360" mp4="https://cdnimpuls.com/lapsi.al/wp-content/uploads/2025/11/6908eaf88a1ef.mp4"][/video]
Klasifikimi: Elbasani në krye, Flamurtari fundoset
Me këtë fitore, Elbasani ngjitet në krye të renditjes së Superiores me 20 pikë, një më shumë se Vllaznia, e cila ka një ndeshje më pak për të zhvilluar. Në anën tjetër, Flamurtari mbetet në fund të tabelës me vetëm 5 pikë pas dhjetë javësh, duke e thelluar krizën e rezultateve dhe të besimit.
Moriero shpërthen: “Na mohojnë penallti çdo javë”
Trajneri i Flamurtarit, Francesco Moriero, nuk i fshehu zhgënjimin e tij pas ndeshjes. Ai u ndal gjerësisht te episodet e kontestuara, duke nënvizuar se ekipi i tij po penalizohet rregullisht nga vendimet arbitrare.
“Sot ishte një paraqitje shumë e mirë e çunave të mi. Për të disatën herë nuk na është dhënë një penallti. Kur ndodh kjo, gjithçka bëhet e vështirë, por ne nuk do të dorëzohemi”, deklaroi Moriero. Tekniku italian theksoi se skuadra nuk meritonte humbjen, duke theksuar se kundërshtari shënoi nga e vetmja goditje në portë: “Na bënë vetëm një goditje në portë. Patëm shumë mundësi, por nuk ishim me fat. Ekipi tregoi karakter dhe zemër. Nuk dua alibi, por dua respekt. VAR ekziston për të ndihmuar futbollin, jo për të krijuar më shumë dyshime.”
Lexo më tej: Dinamo reziston me 10 lojtarë ndaj Teutës, Daja shpërthen: “S’po flet me shokun tënd”
Në fund, Moriero e pranoi me sportivitet fitoren e Elbasanit, por kërkoi më shumë drejtësi në vendimmarrje: “Kjo nuk do të thotë që Elbasani nuk e meritoi fitoren, por çdo javë ne flasim për episode. Duam vetëm atë që na takon.”
Gvozdenovic: “Fitore karakteri, sot luajtëm për pikët”
Në krahun tjetër, trajneri i Elbasanit, Ivan Gvozdenovic, u shfaq i qetë, por i kënaqur me reagimin e skuadrës së tij në një transfertë të vështirë si ajo e Vlorës. “Kjo fitore me vuajtje tregon cilësi dhe karakter. E dija që do të ishte një fushë e komplikuar. Sot nuk donim futboll të bukur, donim vetëm fitoren,” – u shpreh ai.
Tekniku serb pranoi se ndryshimet taktike pas golit ishin vendimtare: “Pas avantazhit, Flamurtari nisi të luante me topa të gjatë. Ndryshova sistemin për të sjellë ekuilibër dhe djemtë reaguan shumë mirë. Kishim pak stres, por e menaxhuam me qetësi.” Në fund, Gvozdenovic nënvizoi se çdo fitore në Superiore vjen me sakrificë: “Nuk mund të luash gjithmonë bukur. Sot qëllimi ishte i qartë – tri pikët. Dhe djemtë e arritën me meritë.”
