Tirana ndryshon akoma drejtimin teknik, duke emëruar trajnerin e tretë brenda një faze kampionat. Ardian Nuhiu është zyrtarisht trajneri i ri i bardhebluve, duke marrë kështu vendin e italianit Roberto Bordin, që nga ana e tij zëvendësoi në pankinë Vangjel Milen. E habitshme se si klubi më i titulluar në vend ka një mungesë kaq të theksuar vizioni, duke gabuar për të dytën herë radhazi zgjedhjen.
Mile, pasi udhëhoqi fazën përgatitore të Tiranës, qendroi vetëm dy ndeshje në pankinë dhe e pa veten nga njeriu i duhur në sakrificën strategjike të klubit, që solli në krye të ekipit “strategun” italian. Bordin mbijetoi me këtë titër vetëm 7 ndeshje, nga të cilat mbahet mend vetëm derbi i fituar me Partizanin. Për të tjerat renditja flet vetë, por jo për teknikun, por për Tiranën: vendi i parafundit me 6 pikë në 9 ndeshje.
Prapaskenat e shkarkimit të Bordin
Tani te Tirana mbërrin Nuhiu. 46-vjeçari qëndroi pa ekip vetëm një muaj, pasi në shtator u largua nga Gjilani dhe tani do të ulet në një pankinë që lëkundet. Sidoqoftë, me të bardheblutë kishin të paktën 10 ditë që kishin kontaktuar dhe pritej vetëm rasti i duhur. Rast që erdhi nga shpartallimi me Elbasanin. Përse kjo situatë, kur Bordin kishte pothuaj vetëm dy muaj në detyrë? Sepse italiani dhe drejtori sportive i Tiranës Omer Bunjaku kanë patur përplasje të forta, që kanë thyer raportin mes të dyve. Në këtë rast, presidenti Halili ka mbajtur krahun e Bunjakut që e ka bindur të sjellë në pankinë ish-teknikun e Shkupit, me të cilin ka raporte miqësore që nga 2018.
Evitohen komentet
Halili tashmë natyrisht duhet të paguajë Bordin për pjesën e mbetur të kontratës, gjë që ndoshta numri 1 i klubit e ka harruar. Kontrata e italianit me kryeqytetasit ishte deri në fund të sezonit me opsionin e rinovimit, nëse gjërat do të shkonin mirë.
Një kaos total, që vetë klubi bardheblu e ka kuptuar. Tifozët janë krejtësisht të pakënaqur jo vetëm me rezultatet, por edhe me menaxhimin e situatës dhe kjo lëvizje nuk është se do të qetësojë shpirtrat. Pikërisht për të evituar vërshimin e komenteve negative, Tirana e ka prezantuar Nuhiun ndryshe nga paraardhësit: pa bërë asnjë postim, por vetëm një story, ku natyrisht nuk shfaqen komentet.
