Nuk ishte një ndeshje e qetë ajo mes Napolit dhe Inter: fitorja e skuadrës së kaltër u shoqërua me tension në fushë, mes një penalltie shumë të diskutueshme dhe përplasjes verbale mes Antonio Conte dhe Lautaro Martinez. Tensionet e vjetra mes të dyve, të lindura gjatë dy viteve të përbashkëta te Inter, shpërthyen pas një përplasjeje mes Dumfries dhe Olivera në minutën e 61’, kur Lautaro e shfrytëzoi rastin për një shpërthim të ashpër verbal ndaj ish-trajnerit të tij.
Në fund të ndeshjes, Conte minimizoi incidentin, duke folur për “përplasje normale në ndeshje të zjarrta”, por gjithsesi hodhi një thumb ndaj ish-lojtarit të tij nga pikëpamja njerëzore. Edhe në të kaluarën, marrëdhënia mes tyre kishte treguar krisje, siç ndodhi gjatë ndeshjes ndaj Romës në vitin 2021, kur zëvendësimi i Lautaro Martinez shkaktoi reagime shumë nervoze.
Lautaro i përsëriti të njëjtat fjalë si dikur
Në të dyja rastet, Lautaro Martinez i përsëriti të njëjtat fjalë, duke e ftuar trajnerin nga Leçe që t’i zgjidhnin gjërat “larg kamerave”: situata që tregojnë një raport që nuk është qetësuar kurrë plotësisht, pavarësisht videos së famshme të “ringut të paqes” që Inter publikoi në atë kohë për të heshtur zërat mbi ndarje të brendshme në dhomën e zhveshjes.
Në “Maradona”, sulmuesi argjentinas përsëriti disa herë shprehjen “eja brenda”, ashtu si në ndeshjen Inter–Roma, duke shoqëruar gjithçka me gjeste që u panë qartë si në stadium, ashtu edhe nga ekranet televizive.
Çfarë ndodhi mes Conte e Lautaro gjatë Napoli–Inter
Zënka shpërtheu në minutën e 61’: Dumfries mbeti i shtrirë pas një kontakti me Olivera dhe Conte ndërhyri duke e ftuar të ngrihej, pa e ekzagjeruar rënien. Kjo ndezi tensionin mes lojtarëve dhe pankinave. Lautaro Martinez e shfrytëzoi momentin për të shfryrë mllefin e vjetër ndaj ish-trajnerit, duke i thënë fjalë të forta dhe duke bërë gjeste provokuese.
Lexo më tej: Kush vendosi për penalltinë e fituar nga Di Lorenzo: çfarë ndodhi në Napoli–Inter
Conte reagoi me një “Qesh ky ka*i ). Arbitri Mariani vendosi të ndëshkonte vetëm trajnerin e Napolit, pa e ndëshkuar argjentinasin Lautaro. Sa i përket asaj që ndodhi, trajneri leçez u shpreh kështu për DAZN, duke përmendur eksperiencën e tij te Inter dhe raportin me kapitenin aktual zikaltër: “Ajo që dua të kujtoj është se unë e bëra Inter të fitonte kampionatin pas dhjetë vitesh, duke ndërprerë nëntë titujt radhazi të Juventus, dhe ju e dini mirë se çfarë përfaqëson Juventus për mua. Lautaro është një lojtar i madh, por nga pikëpamja njerëzore e njoh pak. Dy vjet janë pak për të njohur mirë një lojtar.”
Raporti mes Conte e Lautaro: zënka dhe “ringu i paqes”
Tensionet mes Antonio Conte dhe Lautaro Martinez e kanë origjinën nga dy vitet që kaluan bashkë te Inter. Raporti, tashmë i brishtë, u bë i dukshëm gjatë ndeshjes kundër Romës në vitin 2021, kur për shkak të pandemisë stadiumet ishin bosh dhe çdo fjalë dëgjohej qartë.
Në atë ndeshje, Conte e zëvendësoi argjentinasin, i cili reagoi duke goditur një shishe dhe duke u përplasur verbalisht me trajnerin, që e qortoi publikisht. Përplasja u shua vetëm pas ndërhyrjes së Orialit.
Conte dhe Lautaro “pajtohen” në ring
“Goditjet në fytyrë duhet t’ia japësh vetes, Lautaro, e kuptove? Goditjet t’ia japësh vetes, kuptove? Fenomen, fenomen i ka*rit…” – i tha Conte, ndërsa sulmuesi argjentinas u përgjigj: “Eja brenda, e shohim pastaj brenda…”.
Menjëherë ndërhyri Oriali, duke i thënë: “Jo, çfarë brenda! Nuk jemi në O.K. Corral këtu, brenda asgjë, duhet të rrish urtë, mbylle gojën.” Por me pak sukses, pasi Lautaro vazhdoi: “Jo, do shihemi brenda, s’ka pse të më bezdisë… gjithmonë kështu, edhe në Bergamo!”
Gjithçka u mbyll me një video “paqësimi”, ku të dy simulonin një duel boksi në një ring në Pinetina. Megjithatë, duket se edhe pas atij momenti, plagët mes tyre nuk ishin shëruar vërtet.
