Antonio Conte u pushtua nga entuziazmi pas fitores së bukur dhe të vlefshme që Napoli i tij arriti ndaj Inter, dhe nuk u tregua aspak i butë ndaj presidentit zikaltër, Marotta. Të gjithë prisnin fjalë të forta për Lautaron (“lojtar i shkëlqyer, por nga pikëpamja njerëzore nuk kam pasur rastin ta njoh mirë”), me të cilin ishte protagonist i një përplasjeje të hapur e të bujshme në fushë, por trajneri nuk përdori “shpatën e hollë”, por “shpatën e rëndë” ndaj drejtuesit që ishte ankuar për penalltinë e dhënë kundërshtarëve, e cila kishte zhbllokuar rezultatin.
Conte i përgjigjet Marotta pas Inter–Napoli
Referimi i presidentit të Interit ndaj “penalltisë së vogël”, pra “rigorinos”, nuk i pëlqeu aspak teknikut Conte. Asnjë “përkëdhelje” për drejtuesin me të cilin ai ka punuar si në kohën e Juventus, ashtu edhe në periudhën zikaltër: “Shiko, ndryshimi mes Napolit dhe Inter është që Inter, sapo ka mundësi, dërgon drejtuesin Marotta, ose gjithsesi skuadrat e tjera dërgojnë drejtuesit e tyre. Ne, përkundrazi, dal unë të flas.”
Lexo më tej: Conte nuk përmbahet më në konferencë: “Nuk tallet by*ha me Napolin e napolitanët”
Alibitë e Inter pas humbjes
Antonio Conte ishte kategorik: po të ishte në vendin e teknikut Chivu, nuk do ta kishte lejuar kurrë drejtuesin e klubit Marotta të paraqitej në sallën e shtypit. Edhe pse për një çast vetë trajneri harroi se sot Marotta është bërë president i Inter: “Sipas meje, një skuadër e madhe duhet të bëjë vlerësimet e duhura dhe të kuptojë pse humbi sot. Të mos kërkojë justifikime, sepse kjo krijon alibi për lojtarët, alibi për ambientin, dhe mendoj se kjo është plotësisht e dëmshme. Unë nuk do ta kisha lejuar një gjë të tillë, si trajner, nga ndonjë drejtues i imi. Në këtë rast, tani Marotta është bërë edhe president, pra po bën një ngritje të madhe në karrierë, drejtori.”
Conte frenon në fund, por jo pa thumbime
Në fund, trajneri i Napolit u përmbajt – megjithëse me vështirësi. Ai theksoi rëndësinë e punës së tij dhe faktin që gjithmonë ka preferuar të flasë vetë, në vend të drejtuesve: “Që të vijë një president e të bëjë këto komente, e shoh vërtet… me gjithë respektin që kam për drejtorin. Të lërë gjërat në dorë të atyre që marrin pjesë në ndeshje dhe të mos ndërhyjë, sepse në këtë mënyrë i ul edhe autoritetin trajnerit, dhe kjo nuk është mirë. Nuk u kam kërkuar kurrë presidentëve të mi të sillen si baballarë, të vijnë e të më mbrojnë. Gjithmonë jam mbrojtur vetë. Këto mbrojtje ‘zyrtare’ bëhen paksa… Epo, mirë, s’ka gjë.”
