Prodhuesi shtetëror turk i sektorit të mbrojtjes, MKE, ka nënshkruar një marrëveshje për ndërtimin e një strukture prodhimi municionesh “çelës në dorë” në Kosovë, një hap që dëshmon thellimin e bashkëpunimit të mbrojtjes midis Ankarasë dhe Prishtinës.
Siç raporton DailySbah, fabrika do të ketë kapacitet vjetor prodhimi prej 20 milionë fishekësh dhe pritet të përfundojë deri në vitin 2026. MKE do t’i furnizojë Kosovës linjat e prodhimit për fishekë dhe plumba, pajisjet e ngarkimit dhe montimit, si dhe laboratorë testimi.
Kompania turke do të ndërtojë ndërtesat e nevojshme dhe do të ofrojë trajnime për prodhim, mirëmbajtje dhe riparim, si dhe asistencë teknike për fuqinë punëtore lokale.
Njoftimi vjen pas dërgesave të fundit të dronëve kamikazë në Kosovë nga kompania turke Baykar - ndër të cilat modelet Skydagger - dhe pas blerjes më parë të platformave ajrore pa pilot Bayraktar TB2 në korrik 2023.
Dorëzimi i Skydaggerit në Kosovë, më 8 tetor, shkaktoi reagime të ashpra nga Serbia, por gjithashtu nxiti edhe reaksione diplomacie mes Beogradit dhe Ankarasë.
Kryeministri në detyrë i Kosovës, Albin Kurti, më parë ka konfirmuar planet për ngritjen e fabrikës së parë të municioneve dhe të një laboratori për projektimin e dronëve, si pjesë e përpjekjeve për të zhvilluar industrinë e mbrojtjes të vendit dhe për të rritur kapacitetet për t’u përballur me kërcënime të mundshme në rajon.
Rritja e angazhimit ushtarak dhe investimeve në mbrojtje ndodh ndërsa në Kosovë vazhdon të jetë e pranishme forca e NATO-s me mbi 4,000 trupa paqeruajtëse, kryesisht në pjesën veriore të vendit, ku tensionet etnike janë intensifikuar në dy vitet e fundit.
MKE po zgjerohet gjithashtu globalisht -kompania ka përfunduar kohët e fundit projekte të ngjashme në Jordani dhe Mongoli dhe, sipas raportimeve, është në bisedime me tetë vende të tjera për ngritjen e fabrikave të municioneve dhe pajisjeve për mbushje e montim.
Kjo marrëveshje pritet të forcojë më tej lidhjet ndërmjet Ankarasë dhe Prishtinës në fushën e sigurisë dhe prodhimit ushtarak, ndërsa edhe fuqitë rajonale dhe aktorët ndërkombëtarë do të ndjekin zhvillimet për ndikimet e mundshme mbi stabilitetin dhe ekuilibrin e sigurisë në Ballkan.
