Courtois akuzon ashpër Tebas: “Përpiqen të fshehin gjërat, po manipulon gjithçka”

Zhvendosja e ndeshjes Villarreal-Barcelona në Shtetet e Bashkuara ka krijuar jo pak probleme brenda futbollit spanjoll, ku të gjithë po marrin një qëndrim shumë të qartë kundër këtij vendimi. Në javën e fundit të kampionatit, lojtarët protestuan duke qëndruar të palëvizshëm për 20 sekondat e para të ndeshjes, por ka nga ata që kanë shkuar edhe më tej, duke drejtuar gishtin drejtpërdrejt kundër drejtuesve të La Liga. Në konferencën për shtyp në prag të ndeshjes së Champions League kundër Juventusit, Thibaut Courtois sulmoi Javier Tebas me fjalë mjaft të ashpra.

Courtois akuzon Tebas për censurë

Ai nuk përdor fjalë të ndërlikuara dhe shkon drejt e në thelb kur e pyesin se ç’mendon për gjithë situatën, duke nisur nga fakti që asnjë televizion nuk ka treguar protestat. Ndërsa lojtarët qëndronin të palëvizshëm në fushë, në televizion janë transmetuar pamje ajrore nga jashtë stadiumit për të mos treguar çfarë po ndodhte, një situatë që shumëkujt i është dukur e papërshtatshme. Portieri i Real Madrid ka një mendim shumë të qartë për këtë çështje dhe nuk ka frikë ta shprehë: “Nuk e di pse të habit, kjo gjë po ndodh prej disa kohësh. Nuk kam parë kurrë presidentin e një lige të ndonjë sporti tjetër të reagojë në këtë mënyrë”.

Courtois sobre la censura de las imágenes de la protesta de los jugadores en los partidos de Liga: "No se qué os sorprende, eso lleva siendo tiempo así. Yo no he visto jamás al presidente de una liga de otro deporte contestar así" "Ocultarlo es censura, es manipular y es grave" pic.twitter.com/WKCzjne8h9

— MARCA (@marca) October 21, 2025

Madje Courtois fajëson presidentin e La Liga për gjithçka që po ndodh në futbollin spanjoll, ku ka shpërthyer kaosi pas vendimit për të zhvilluar ndeshjen Villarreal-Barcelona në Miami në dhjetor. Një vendim pa precedent që nuk ka gjetur mbështetjen e lojtarëve dhe as të sindikatës së tyre, e cila ndërhyri menjëherë. Për këtë arsye, portieri godet rëndë Tebas, sidomos pas zgjedhjes së televizioneve për të errësuar protestat dhe për të mos i treguar ato për publikun në shtëpi: “T’i fshehësh është censurë, është manipulim dhe është diçka serioze”.