Keith Urban duket se ka thumbuar martesën e tij me Nicole Kidman përpara se të bëhej publike ndarja e tyre.
Gjatë premierës së serialit të ri në CBS, “The Road”, i cili ndjek 12 muzikantë të rinj që konkurrojnë për të hapur koncertet e Urban nëpër SHBA, këngëtari 57-vjeçar interpretoi këngën e tij më të re, “Straight Line”, nga albumi “High”.
Urban kishte shpjeguar në shkurt 2024 se kjo këngë flet për “dëshirën për të shpëtuar nga një rutinë që të vret shpirtin, ku mund të jesh i ngecur në një marrëdhënie, në një punë, në krijimtari apo edhe me vetveten.”
“Straight Line flet për ndjenjën e të qenurit gjallë sërish dhe për të dalë nga ajo re e zezë që të mbulon,” shkroi ai në Instagram. “Nëse na keni parë ndonjëherë live, shpresoj që kjo këngë t’ju japë të njëjtën ndjesi.”
Këngëtari gjithashtu pranoi se zgjodhi këtë këngë kryesore të albumit për shkak të energjisë dhe shpirtit që ajo përçon – një mesazh që shtrihet në të gjithë projektin muzikor.
Por komentet e Urban morën më shumë kuptim pas lajmit të ndarjes së tij me Nicole Kidman, e cila dorëzoi kërkesën për divorc më 30 shtator 2024, pas 19 vitesh martesë. Sipas burimeve për revistën People, çifti ishte ndarë në heshtje që në fillim të verës dhe kishin filluar të jetonin të ndarë.
“Jetët e tyre po lëviznin në drejtime të ndryshme,” tha një burim. “Pasi Keith krijoi një hapësirë të vetën, ndarja dukej e pashmangshme.”
Më tej, në episodin e parë të “The Road”, Urban u tregua emocional kur foli për vetminë dhe vështirësitë gjatë turneve muzikore:
“Zgjohesh në autobus në 3:30 të mëngjesit, je sëmurë, në mes të askundit, dhe ke për të dhënë koncertin e pestë për javën – nuk ke fjetur, mungon familja, ndihesh i vetëm dhe i rraskapitur… dhe pyet veten: ‘Pse po e bëj këtë?’ Përgjigjja e vetme është: sepse për këtë kam lindur.”
Spekulimet janë shtuar edhe më tej pasi burime të shumta sugjerojnë se Urban mund të jetë tashmë në një lidhje të re.
“Të gjitha shenjat tregojnë se Keith është me një grua tjetër,” citohet një burim. “Nicole nuk e mohon këtë, por ende është e tronditur.”
Çifti Urban-Kidman u martuan në vitin 2006 dhe janë prindër të dy vajzave: Sunday, 17 vjeçe, dhe Faith, 14.
