Në Sheshin “Skënderbe” të Tiranës ka nisur protesta madhështore kundër padrejtësive të Gjykatës Speciale në Hagë ndaj ish-krerëve të Ushtrisë Çlirimtare të Kosovës.
Sheshi kryesor i kryeqytetit shqiptar është mbushur përplot me qytetarë që po shprehin solidaritetin e tyre me Hashim Thaçin, Kadri Veselin, Jakup Krasniqin dhe Rexhep Selimin – duke kërkuar drejtësi për luftën çlirimtare të Kosovës.
Në mesin e pjesëmarrësve gjendet edhe djali i ish-presidentit Hashim Thaçi, Endriti, përkrah shumë figurave të njohura nga jeta publike e politike shqiptare.
Protesta, e organizuar nën moton “Drejtësi për çlirimtarët”, po zhvillohet në atmosferë të qetë dhe me thirrje për unitet kombëtar përballë padrejtësive që, sipas organizatorëve, po i bëhen historisë së luftës së Kosovës.
