Në tubimin pro komandantëve të UÇK-së, kandidatja e PS për Bashkinë e Tiranës, Ogerta Manastirliu shihet krah për krah me Përparim Ramën, kryetarin e Bashkisë së Prishtinës. Për vëzhguesit e vëmendshëm lind një pyetje krejt e natyrshme. A është rastësi gjysëm protokollare apo provë gjenerale për karrigen e kryebashkiakes?
Pozicioni në vijën e parë ngjitur me një homolog ende në detyrë duket si pozicionim i menduar mirë. Pak solidaritet, pak profil shtetëror dhe shenjë se Ogerta e ka vendin mes kryetarëve. Në sfond flamujt e UÇK-së dhe në plan të parë mesazhi politik se ka ardhur koha që Tirana të ketë një kryetare. Dhe Manastirliu duket se nuk do të presë të mbahen zgjedhjet për të filluar ta luajë këtë rol.
Mund të quhet edhe rastësi, por me këtë kornizë Partia Socialiste përgatit imazhin e kryebashkiakes para se ta konfirmojnë votat në zgjedhjet që ende nuk dihet se kur do të mbahen. Në politikë, fotoja shpesh vlen më shumë se fjala. Ogerta sot e ka bërë të sajën. ©Lapsi.al
