Kancelari gjerman Friedrich Merz paralajmëroi se Europa do të humbasë pavarësinë e saj ndaj gjigantëve ekonomikë globalë nëse liderët e saj nuk veprojnë me shpejtësi për të rikthyer konkurrueshmërinë.
Duke folur në parlamentin gjerman të enjten, përpara një samiti të liderëve evropianë në Bruksel javën e ardhshme, Merz i bëri thirrje bllokut të ndërmarrë reforma të gjera ekonomike ose të rrezikojë të humbasë rëndësinë globale.
“Kjo është jetike për të ardhmen e vendit tonë dhe të vendeve të Evropës, sepse në javët, muajt dhe ndoshta brenda disa viteve të ardhshme do të vendoset nëse Evropa do të mbetet një fuqi ekonomike e pavarur në ekonominë globale apo nëse do të kthehemi në një peng të qendrave të mëdha ekonomike në Azi ose në Amerikë,” tha Merz.
Merz është nën presion politik në rritje në vend për të bërë më shumë në adresimin e ngecjes ekonomike të Gjermanisë. Pas dy vitesh rresht të kontraktimit ekonomik, ekonomistët presin pak ose aspak rritje këtë vit, pjesërisht për shkak të politikave tarifore të presidentit amerikan Donald Trump, të cilat goditën veçanërisht rëndë ekonominë eksportuese të Berlinit. Udhëheqësit e biznesit gjerman tani po i kërkojnë kancelarit të ndërmarrë reforma më të guximshme për të nxitur rritjen.
Koalicioni qendror i Merzit është zotuar të ndërmarrë reforma në tregun e punës dhe në sistemin e mirëqenies. Por javët e fundit, Merz ka drejtuar gjithnjë e më shumë gishtin nga Brukseli, duke i kërkuar bllokut të shkurtojë burokracinë për biznesin, të forcojë tregun e brendshëm të BE-së dhe të nënshkruajë më shumë marrëveshje tregtare globale.
“Nuk kemi një problem me ndërgjegjësimin në Europë; kemi një problem me zbatimin,” tha Merz të enjten. “Prandaj kam ndërmend ta ngre sërish këtë çështje të zbatimit me partnerët tanë evropianë. Dhe edhe një herë, kjo ka të bëjë para së gjithash me konkurrueshmërinë e ekonomisë sonë evropiane.”
Merz sugjeroi se një plan veprimi është tashmë mbi tryezë, duke iu referuar dy studimeve të ish-kryeministrave italianë Mario Draghi dhe Enrico Letta mbi propozimet për thellimin e tregut të brendshëm të BE-së dhe rritjen e konkurrueshmërisë. “Këto dy raporte nuk duhet të përfundojnë në dollapët e dosjeve të Komisionit Evropian,” tha Merz. “Ato tani i takojnë rendit të ditës së Bashkimit Evropian.”
Merz i bëri thirrje Komisionit të negociojë më shumë marrëveshje tregtare vetëm në nivel të BE-së me vende dhe blloqe tregtare anembanë botës. Ai po ashtu i kërkoi BE-së të miratojë një marrëveshje tregtare me bllokun e vendeve të Amerikës së Jugut, Mercosur, përpara fundit të vitit.
Politico, përgatiti në shqip ©LAPSI.AL
