Kapitulli i Kombëtares është mbyllur, deri në nëntor e tani hapësirë kampionatit kombëtar. Kategoria Superiore rikthehet këtë fundjavë, me ndeshjet e javës së 7-të që do të luhen të ndara në dy ditë: tre të shtunën dhe dy të dielën. Dinamo ka një test të rëndësishëm me Egnatian, që përcakton edhe kreun e klasifikimit, duke qenë se rrogozhinasit ndajnë pikët me Vllazninë.
E pikërisht shkodranët ngrenë siparin e javës në Ballsh përballë Bylis. Në stadiumin “Adush Muça” në ora 14:00 Vllaznia do të kërkojë të shkëputet në vendin e parë, duke përfituar edhe nga sfida impenjative e Egnatias, që sfidohet në Rrogozhinë nga Dinamo. Çështja është se lojtarët e Martinit jashtë nuk janë aq efikasë sa në Loro Borici, ndaj dhe duhet të bëjë kujdes nga skuadra e Josës që vjen nga një humbje në Durrës. Në dy takimet e tjera të së shtunës, Tirana do të presë Teutën në “Air Albania” ndërsa Egnatia do të përballet me Dinamo City në “Arena Egnatia”. Të dyja ndeshjet do të luhen në ora 17:00.
Lexo më tej: Dinamo fiton derbin me Tiranën, por Teqja shpëton Dajën: Bordin i fundit
Tirana e Bordin shpreson në një tjetër rezultat si ai në derbi për tu larguar nga zona e ftohtë e për ti dhënë vazhdimësi fitores me Partizanin. Aspak e lehtë sepse përballë do të jetë Teuta e Dobit, e vetmja e pamundur në kampionat. Tetova gjithashtu, me rezultatin e njohur të ndeshjes së Vllaznisë, duhet të kalojë një pretendent si Dinamo. Me dy fitore radhazi skuadra e Dajës ka siguruar besimin e duhur për tu përballur me kampionët në fuqi, që sidoqoftë vijnë nga një seri prej 4 suksesesh radhazi.
"Profesori" vs "nxënësit"
Të dielën do të luhen dy sfidat e fundit të kësaj jave, në ora 17:00. Elbasani do të luajë kundër Vorës në “Elbasan Arena”, ndërsa Partizani do të udhëtojë drejt Vlorës, ku do të përballet me Flamurtarin. Gvozdenovic kërkon të kthejë verdheblutë në shinat e rezultateve positive, pasi provoi humbjen e parë në kampionat. Ajo kundër debutuesve të Vorës duket si ndeshja ideale për ta bërë, por njerëzit e Bellait nuk janë nga ato që heqin dorë pa e provuar.
Në Vlorë takohen dy skuadra emblem, por që mbajnë dy vendet e fundit në renditje: të duyja sapo kanë ndryshuar trajner dhe kërkojnë të bëjnë kthesën e sezonit. Flamurtari tashmë do të udhëhiqet nga Francesco Moriero dhe kapet fort pas debutimit fitimtar në Kupën e Shqipërisë. Në anën tjetër, italiani do të gjejë ish-nxënësin e tij te Laçi. Oltion Kërnaja ka në duar tashmë timonin e Partizanit dhe të dy e njohin mirë njëri-tjetrin. Edhe të kuqtë janë në vështirësi dhe shpresojnë që pauza e kampionatit të ketë ndërprerë edhe rezultatet negative të tyre.
