Përplasje në distancë mes Lëvizjes Vetëvendosje dhe kryeministrit Edi Rama. Ky i fundit përmes një mesazhi në rrjetet sociale, theksoi mes ironisë se Vetëvendosja i paska kushtuar një çarçaf të gjatë.
Rama sqaron se nuk ka asnjë garë me Vetëvendosjen sa i takon çështjes së ish-luftëtarëve të UÇK-së, ndërsa thekson se kjo e fundit ngatërron çështjet institucionale me balotazhin që sollën zgjedhjet lokale në Kosovë.
Lexo më tej: Protesta në mbrojtje të ish-krerëve të UÇK, Vetëvendosja: Rama të kërkojë falje
REAGIMI I RAMES
Lëvizja Vetëvendosje më paska kushtuar një çarçaf të gjatë, ku shkruan se përpara 10 vjetësh unë paskam qenë pro kurse ajo paska qenë kundër Gjykatës Speciale… Ndërkohë unë e kam denoncuar farsën ndaj Hashim Thaçit e të tjerëve kurdo e kudo ka qenë rasti a nevoja, ndërsa Lëvizja dihet se sa ka lëvizur në atë drejtim.
Por unë s’jam në asnjë lloj gare me Lëvizjen dhe më vjen keq që Lëvizja i ngatërron marrëdhëniet institucionale të Kosovës me Shqipërinë në çorbën e balotazheve komunale, ndërsa për qëndrimet e para 10 vjetëve – kur ajo nuk njihte as himnin e Kosovës e jo më pafajësinë e Hashim Thaçit, të cilin do ta donte përjetësisht në Hagë – i kujtoj Lëvizjes se Gjykata Speciale u ngrit për trafikun e organeve, jo për të marrë peng Presidentin e Republikës së Kosovës.
Dhe e fundit, unë as nuk jam organizator e as nuk jam folës i protestës gjithëkombëtare “Drejtësi për Çlirimtarët”, të cilën e mbështes megjithë zemër e do t’i bashkohesha si pjesëmarrës i thjeshtë, nëse nuk do të isha i vetëdijshëm se çdo politizim me dashje ose jo i asaj nisme, do të dëmtonte qëllimin dhe popullaritetin e saj.
