Një aksident rrugor u regjistrua paraditen e së enjtes në aksin Kardhiq–Delvinë, në dalje të tunelit të Skërficës, ku një automjet humbi kontrollin dhe përfundoi jashtë rruge, duke lënë të plagosur dy persona.
Mjeti tip Mercedes-Benz, me targë AB848UI, drejtuar nga Denis Metaj, 37 vjeç, banues në Vlorë, ka dalë nga rruga dhe është përplasur me murin mbrojtës anësor.
Përplasja ka qenë e fortë, duke shkaktuar dëmtime për drejtuesin dhe pasagjerin në automjet.
Si pasojë, Metaj ka pësuar plagë në fytyrë nga xhami i thyer, ndërsa pasagjeri, Hati Rakipaj, 21 vjeç, gjithashtu banues në Vlorë, ka marrë një frakturë në këmbë.
Të dy të plagosurit janë transportuar menjëherë në urgjencën e Spitalit të Sarandës, ku kanë marrë ndihmën e parë mjekësore. Burime nga spitali bëjnë me dije se gjendja e tyre shëndetësore është jashtë rrezikut për jetën.
Më pas, ata pritet të transportohen me ambulancë drejt Spitalit Rajonal të Vlorës për vijimin e trajtimit.
Në vendngjarje mbërritën shërbimet e Qarkullimit Rrugor të Sarandës, të cilat po punojnë për të zbardhur shkaqet e aksidentit. Nga verifikimet paraprake rezulton se drejtuesi i mjetit nuk kishte konsumuar alkool, me testin që doli negativ (0.00 mg/L).
Hetimet vijojnë për të përcaktuar rrethanat e plota të ngjarjes.
