Një 22-vjeçar grek u arrestua si bashkëpunëtor në vrasjen e dyfishtë në një kamping në Finikounda që ndodhi të dielën e 5 tetorit. Në atë ngjarje humbi jetën një 68-vjeçar grek, pronar i një kampingu dhe një punonjës i tij, shqiptar.
Këtë mëngjes 22-vjeçari grek shkoi në polici së bashku me avokatin e tij, për t'u dorëzuar. Protothema shkruan se fillimisht, burimet policore raportuan se ai është një i afërm i pronarit të kampingut që u vra. Megjithatë, sipas informacioneve, ai nuk është i afërm i viktimës, por ka qenë pasagjer në motoçikletën me të cilën lëvizi autori pas ngjarjes.
Ai i dha policisë emrin e autorit, i cili është gjithashtu 22 vjeç dhe është identifikuar tashmë. Të dy të rinjtë thuhet se njohin një të afërm të pronarit. I riu i ndaluar dyshohet se i tha policisë se viktima (pronari i kampingut) e kishte ngacmuar seksualisht në verën e vitit 2022, kur ai kishte vizituar kampingun dhe kishte takuar viktimat. 22-vjeçari pretendoi se ata donin ta shantazhonin pronarin për para.
Megjithatë, hetuesit besojnë se të paktën 3 persona janë të përfshirë në vrasjen e dyfishtë, që do të thotë se ka edhe një organizator, ndërsa autori i vrasjes së dyfishtë në kamping është ende i lirë.
Vrasja ndodhi mbrëmjen e 5 tetorit në një kamping në Finikounda, kur autori, pasi kishte mbuluar fytyrën, hyri me forcë në recepsionin ku ndodhej pronari 68-vjeçar me kujdestarin e tij shqiptar 60 vjeç dhe njëkohësisht mikun e tij të vjetër.
Personi i armatosur qëlloi me gjakftohtësi pronarin, duke e plagosur për vdekje, dhe më pas vrau mikun e tij, i cili u përpoq të arratisej. Në vrasjen e dyfishtë ishte i pranishëm edhe nipi i pronarit, i cili arriti të arratisej. /LAPSI.al
