Një shpërthim i madh në një strukturë ushtarake që trajton dhe prodhon eksplozivë në jugperëndim të Nashville ka shkaktuar vdekjen e disa personave dhe ka lënë të paktën 19 të tjerë të zhdukur, thanë zyrtarët e vendit të ngjarjes.
Ngjarja ndodhi pak para orës 08:00 sipas orës lokale të së premtes dhe u dëgjua nga kilometra larg, duke përfshirë qarqe përreth, raporton një degë lokale e CBS News. Video ajrore nga vendi i ngjarjes tregon mbeturina të djegura, automjete që janë përfshirë nga zjarri dhe pjesë të rrënuara të objektit.
Fabrika i përket kompanisë Accurate Energetic Systems, e specializuar në zhvillimin, prodhimin, trajtimin dhe ruajtjen e eksplozivëve. Autoritetet lokale dhe ekipet e emergjencës kanë mbërritur në vendngjarje, por sipas raporteve fillestare një nga ndihmësit e parë tha për Associated Press se nuk kanë mundur menjëherë të hyjnë brenda për shkak të shpërthimeve të vazhdueshme.
Në vendngjarje po punojnë një numër i madh forcash emergjente zjarrfikës, ekipe shpëtimi dhe forca të sigurisë ndërsa hetimet paraprake kanë nisur për të përcaktuar shkakun e shpërthimit dhe për të identifikuar të gjithë të përfshirët. Zyrtarët ende nuk kanë dhënë një shifër zyrtare të viktimave, por thanë se lista e personave të zhdukur mund të ndryshojë ndërsa vijon kërkimi.
Familjarët dhe banorët e zonës janë të shqetësuar ndërsa autoritetet këshillojnë qytetarët të shmangin zonën për të lejuar punën e ekipeve të emergjencës. Mediat lokale dhe kombëtare po mbulojnë ngjarjen, dhe hetuesit federale pritet të përfshihen për shkak të natyrës së objektit dhe lëndëve të përfshira. /Euronews
